12 май дар ноҳияи Мурғоб силсила чорабиниҳо бахшида ба Моҳвораи ҷавонон ва Рӯзи ҷавонони Тоҷикистон бо баргузории ҳамоиши маърифатию сиёсӣ оғоз гардиданд, ки дар он фаъолон ва намояндагони насли наврас аз тамоми ҷамоатҳои деҳоти ноҳия ширкат варзиданд.

Дар доираи он, ҷавонон аз дастовардҳои даврони Истиқлол, аз ҷумла неругоҳи барқи обии “Тоҷикистон”, неругоҳи офтобӣ, Маркази офиятбахшии “Бабри барфӣ”, боғҳои фарҳангиву фароғатии навбунёд ва инфрасохтори дигар таъиноти иқтисодию иҷтимоӣ дидан намуданд.

Сипас, чорабинии тантанавӣ дар майдони муқаддасоти миллӣ - назди Нишон ва Парчами давлатии ноҳия доир шуд.

Таъкид гардид, ки Пешвои миллат муҳтарам Эмомалӣ Раҳмон ба қудрати созанда, неруи зиёӣ ва эҳсоси ватандӯстии насли ҷавон эътимоди комил доранд. Ҷавонони фаъол бо ифтихормандӣ изҳор доштанд, ки дар ҷавоб ба ҳамаи ғамхориҳо, сиёсати хирадмандонаи Роҳбари давлатро ҳамаҷониба дастгирӣ намуда, ҳамчун сипари боэътимоди давлату миллат дар пешрафти меҳан саҳми содиқона мегузоранд.

Дар идома барномаи бошукӯҳи фарҳангӣ бо фарогирии суруду таронаҳо дар васфи Ватан, ҷавонӣ ва Истиқлол пешкаш гардид.
Ба гуфти масъулин, тибқи нақшаи чорабиниҳои тасдиқгардидаи мақомоти иҷроияи ҳокимияти давлатии ноҳияи Мурғоб давоми ин моҳ ташкили мусобиқаҳои оммавии варзишӣ, маҳфилҳои рангини фарҳангӣ ва озмунҳои зеҳниву маорифпарварӣ дар назар аст, ки ба кашфи чеҳраҳои наву таҳкими дӯстиву якдилии насли наврас заминаи устувор мегузорад.

Садоншо ҶАНОБИЛШОЕВ, “ҶТ”