16–уми октябр дар ноҳияи Файзобод таҳти роҳбарии Зулфиқор Гулаҳмадзода – раиси Кумита ва бо иштироки муовини якум ва муовинони раис, котиби генералии Кумитаи миллии олимпии Тоҷикистон, ректори Донишкадаи тарбияи ҷисмонии Тоҷикистон ба номи С. Раҳимов, роҳбарони воҳидҳои сохторӣ, муассисаҳои зертобеъ, сохтор ва зерсохтори Кумита дар ВМКБ, вилоятҳои Суғду Хатлон, шаҳри Душанбе, шаҳру ноҳияҳои тобеи ҷумҳурӣ ва кормандони Дастгоҳи марказии Кумита оид ба ҷамъбасти натиҷаҳои рушди соҳаи кор бо ҷавонон ва варзиши кишвар ва фаъолияти Кумита дар нуҳ моҳи соли 2025 ва вазифагузориҳо барои марҳилаи баъдӣ ҷаласаи сайёри мушовараи Кумитаи кор бо ҷавонон ва варзиши назди Ҳукумати Ҷумҳурии Тоҷикистон баргузор гардид.

Тибқи иттилоъ, нахуст раиси Кумита зимни сухани ифтитоҳӣ мавқеъ ва ҷойгоҳи ҷавононро дар сиёсати пешгирифтаи Ҳукумати мамлакат бориз арзёбӣ намуда, доир ба дастгириву ғамхорӣ ва роҳнамоиҳои пайвастаи Асосгузори сулҳу ваҳдати миллӣ - Пешвои ҷавонпарвари миллат, муҳтарам Эмомалӣ Раҳмон ба ин қишри созандаи ҷумҳурӣ табодули афкор намуд.

Сипас, вобаста ба ҷамъбасти натиҷаҳои рушди соҳаи кор бо ҷавонон ва варзиши Ҷумҳурии Тоҷикистон ва фаъолияти сохтор ва зерсохторҳои Кумита дар нуҳ моҳи соли 2025 аз ҷониби муовини якуми раиси Кумита ҳисоботи муфассал ироа гардид.
Ҳамзамон, сардорони раёсатҳои кор бо ҷавонон ва варзиши вилоятҳои Суғду Хатлон, шаҳри Душанбе ва ВМКБ аз натиҷаи фаъолияти соҳа давоми нуҳ моҳи сипаригардида дар ҳудуди минтақаи худ ҳисобот пешниҳод намуда, аз мушкилиҳои дар соҳа пешомада сухан гуфта, дар идома барои ислоҳи мушкилиҳои ҷойдошта аз ҷониби роҳбарият дастуру супоришҳои мушаххас гирифтанд.

Зимнан, дар қисми музокираи ҷаласа чанд нафар аз роҳбарони сохторҳои маҳаллии Кумита табодули афкор намуда, пешниҳодоти худро ба раёсат манзур намуданд.

Сипас, муовинони соҳавӣ фаъолияти соҳаи кор бо ҷавонон ва варзишро дар тамоми шаҳру ноҳияҳои ҷумҳурӣ мутобиқи ҷадвали махсус мавриди таҳлил қарор дода, натиҷаи таҳлилро тавассути ҳисоботи таҳлилӣ ироа карданд.

Аз натиҷаи ҳисоботи ироашуда фаъолияти сохтор ва зерсохтори Кумита давоми нуҳ моҳи соли 2025 натиҷагирӣ карда шуда, раиси Кумита ҷиҳати иҷрои пурра ва самараноки дастуру супоришҳои Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, Ҳукумати ҷумҳурӣ ва Дастгоҳи иҷроияи Президенти Ҷумҳурии Тоҷикистон ва вазифаҳои низомномавии Кумита, инчунин бартараф намудани камбудиву норасоиҳо ва боз ҳам беҳтар намудани фаъолият то ҷамъбасти семоҳаи чоруми соли 2025 ба масъулин дастуру супоришҳо доданд.

Ҳамчунин, тамоми масъулини сохтор ва зерсохтори Кумита вобаста ба истиқбол аз 35-умин солгарди таҷлили бошукӯҳи ҷашни Истиқлоли давлатӣ дар тамоми қаламрави кишвар вазифадор карда шуда, ҳамзамон талаб карда шуд, ки дар раванди ҳассоси ҷаҳонгароӣ зиракии сиёсиро аз даст надода, ҷиҳати ба роҳи рости ватандориву ватандӯстӣ ҳидоят намудани ҷавонон ва баланд бардоштани нуфузи варзиши тоҷик аз тамоми фишангҳои солиму созанда истифода намуда, баҳри пешгирии амалҳои номатлуб, аз қабили бегонапарастиву зиёдаравӣ суҳбату вохӯриҳоро бо усули деҳа ба деҳа, рӯ ба рӯ ва хона ба хона дар тамоми шаҳру ноҳияҳои кишвар ташаккул диҳанд.

Таъкид гардид, ки дар ҳамкорӣ бо мақомоти дахлдор ва аҳолӣ бояд дар тарбияи насли бофарҳангу босавод ва огоҳу масъулиятшинос, тарғиби тарзи ҳаёти солим байни ҷомеа ва иштироки варзишгарон дар мусобиқаҳои сатҳи ҷаҳонӣ ва иҷроиши нақшаҳои ба тасвибрасида пайваста чораҳо андешида шаванд.

Дар интиҳои ҷаласаи ҳайати мушовара вобаста ба масъалаҳои баррасишуда қарорҳои дахлдор қабул карда шуд.

“ҶТ”