Ба Кумитаи телевизион ва радиои назди Ҳукумати кишвар дар шашмоҳаи аввали соли равон 11 дархост барои таъсиси телевизион ва радио ворид шудааст.

Дар ин хусус имрӯз - 22 июл Нуриддин Саид, раиси Кумитаи телевизион ва радио зимни нишасти хабарӣ иттилоъ дод.

Раиси Кумита гуфт, ки ниҳоди зери идорааш ҳамаи дархостро барои ташкили телевизион ва радиои хусусӣ мавриди омӯзиш қарор дода, дар ин давра ба 5 телевизион, 2 радио ва 4 студияи истеҳсоли маҳсулоти аудиовизуалӣ барои фаъолияташон литсензия ё иҷозатнома додааст.

Ёдовар мешавем, ки айни замон дар мамлакат 101 шабакаи давлативу хусусии телевизиону радио ва студияҳои истеҳсоли маҳсулоти аудиовизуалӣ, аз ҷумла, 15 телевизиону 10 радиои давлатӣ, 18 телевизиони хусусӣ, 16 телевизиони ноқилӣ, 4 телевизиони IP, 24 радиои хусусӣ ва 14 студияи истеҳсоли маҳсулоти аудиовизуалӣ фаъолият дорад.