Дар доираи нақшаи чорабиниҳои "Барномаи давлатии кабудизоркунии Ҷумҳурии Тоҷикистон барои давраи то соли 2040", нақшаи амали он барои солҳои 2025-2027 дар шаш моҳи соли ҷорӣ дар ҳудуди шаҳру ноҳияҳои кишвар, вазорату идораҳо ва ташкилоту муассисаҳои давлатӣ ба миқдори 3 090 264 бех ниҳолҳои дарахтони ҳамешасабзу ороишӣ, сояафкану мевадиҳанда шинонида шудааст, ки 105 фоизи нақшаи ниҳолшинонии соли 2025- ро ташкил медиҳад.

Дар ин бора 25 июл Баҳодур Шерализода, раиси Кумитаи ҳифзи муҳити зисти назди Ҳукумати Ҷумҳурии Тоҷикистон зимни нишасти матбуотӣ иттилоъ дод.

Қайд гардид, ки барои ташкили ниҳолхонаҳо ва хоҷагиҳои ниҳолпарварӣ дар маҷмӯъ 62,8 гектар қитъаҳои замин дар ҳудуди шаҳру ноҳияҳои ҷумҳурӣ ва заминҳои ҳудудҳои махсус муҳофизатшаванда ҷудо ва ба мақомоти дахлдори ҳифзи муҳити зисти маҳалҳо вобаста карда шудааст.

Вобаста ба риояи қонунгузории соҳаи ҳифзи муҳити зист гуфта шуд, ки дар доираи амалисозии назорати давлатӣ 9279 ҳолати вайрон намудани талаботи қонунгузорӣ ошкор карда шудааст, ки қисмати зиёди он дар самти назорати давлатии истифода ва ҳифзи олами набототу ҳайвонот ва захираҳои моҳӣ, ҳифзи замин, канданиҳои фоиданок ва муомилот бо партовҳо мебошад.

Ш. ЭШОНОВА, “ҶТ”