Солимии ҷавонон, ояндаи солимии кишвар ва яке аз омили муҳими рушди ҷомеаи муосир ба ҳисоб меравад. Дилхоҳ шахс танҳо дар ҳолати комилан солим будан метавонад ба қуллаҳои баланди зиндагӣ ва ба комёбиҳои назаррас ноил гардад. Дар асл, солимӣ сарвати бебаҳост. Пас месазад, ки нисбат ба саломатии ҷавонон таваҷҷӯҳи хоса зоҳир намоем.

Лозим ба ёдоварист, ки мубориза бар зуҳуроти номатлуби иҷтимоии ҷомеа дар кору пайкори мо вазифаи аввалиндараҷа маҳсуб меёбад. Имрӯз падидаҳои номатлубе бо номи нашъамандӣ, вируси норасоии масунияти бадан ва дигар омилҳои номатлуби хатарафзо ҷомеаи ҷаҳониро фаро гирифтаву таваҷҷӯҳи ҷаҳониёнро ба худ ҷалб кардааст. Мутаассифона кишвари мо низ чун як ҷузъи ҷомеаи ҷаҳонӣ аз ин вабо дар канор нест.

Дар баробари дастёбӣ ба дастовардҳои назаррас баъд аз соҳибистиқлол гардидани Ҷумҳурии Тоҷикистон, хатару мушкилотҳои наве ҳаёти наврасону ҷавонони кишварамонро таҳдид мекунад, ки муборизаи дастаҷамъона ба муқобили онҳо вазифаи аввалиндараҷаи сохторҳои дахлдор ва ҳар як шаҳрванди солимақлу соҳибмаърифат мебошад. Қобили зикр аст, ки зиёд будани дарсади ҷинояткорӣ, касалиҳои сирояткунанда, нашъамандиву нашъаҷалобӣ ва оворагардию кӯчагардӣ дар байни ҷавонон имрӯз ҷомеаи моро ба ташвиш овардааст. Аз ин рӯ, Ҳукумати мамлакат баҳри беҳдошти вазъи саломатии ҷомеа, бахусус наврасону ҷавонон тавассути мақомоти дахлдор як силсила тадбирҳоро роҳандозӣ намуда, дар самти мазкур санадҳои меъёрии ҳуқуқиро ба тасвиб расонидааст.

Дар ин радиф, Кумитаи кор бо ҷавонон ва варзиши назди Ҳукумати Ҷумҳурии Тоҷикистон вобаста ба масъалаҳои ба саломатии ҷавонон алоқамандро ба мисли ҳамешагӣ дар маркази таваҷҷӯҳи худ қарор дода, дар ҳамкорӣ бо дигар вазорату идораҳои дахлдор силсилаи чорабиниҳои тарғиботиву ташвиқотиро миёни наврасону ҷавонон ҷиҳати нигоҳдошти тарзи ҳаёти солим дар ҷомеа баргузор менамояд. Ҳадаф аз баргузор намудани чунин чорабиниҳо ин мусоидат намудан ба пойдориву устувории тарзи ҳаёти солим байни ҷавонон, эмин нигоҳ доштани ҳаёт ва фаъолияти ҷавонон, тарбияи ҷавонон дар рӯҳияи солим, роҳ надодан ба ақидаю фарҳанги бегона, дӯст доштан ва эҳтиром намудани арзишҳои миллию давлатӣ, таъмини ҳуқуқу озодиҳои инсон ба фазилатҳои баланди сиёсӣ, баланд бардоштани сифатҳои наҷиби ахлоқӣ ва маърифати пурсамари маънавии ҷавонон, кӯшишу ғайрат ва донишу идроки онҳоро барои мустаҳкам намудани истиқлолияти сиёсию, иқтисодӣ, иҷтимоӣ ва фарҳангии Ҷумҳурии Тоҷикистон роҳандозӣ намудан ва мубориза алайҳи гардиши ғайриқонунии маводи мухаддир, гирифтории ҷавонон ба бемории нашъамандӣ мебошад.

Пӯшида нест, ки чунин ҳолат агар ангуштшумор бошад ҳам, дар Тоҷикистон низ ба қайд гирифта шудааст. Агар имрӯз мо пеши ин мушкилиро нагирем пас аз чанд соле мушкилот метавонад яке аз мушкилотҳои аввалиндараҷа гардад. Сатҳи пасти маърифати ҳуқуқӣ тамоми аҳолӣ, хусусан ҷавононро ба кӯчаи сарбастаи зиндагӣ мебарад, ки он натиҷаи ногувореро ба бор меоварад.

Шароити соҳибистиқлолии Тоҷикистон низ тақозо дорад, ки ба ташаккули маърифати ҳуқуқӣ ва фарҳанги сиёсии ҷавонон диққати аввалиндараҷа диҳем. Дар тамоми кишварҳои дунё ҷавонон ба сифати як нерӯи пуриқтидори бунёдкор ва пешбарандаи ҳаёти ҷомеа шинохта ва эътироф шудаанд. Ҷавонон фақат гурӯҳи муқаррарии демографӣ набуда, қишри аз нигоҳи идеологию сиёсӣ ҳассосу қобили меҳнати ҷамъиятие маҳсуб мешаванд, ки дар ояндаи наздик раванду тақдири ислоҳоти иқтисодӣ ва иҷтимоӣ, яъне сурату сирати фардои ҷомеаро муайян хоҳанд кард.

Тавре Сарвари давлат муҳтарам Эмомалӣ Раҳмон таъкид менамояд: «Даврони истиқлол ба ҷавонони соҳибмаърифат, боистеъдоду лаёқатманд, дорои нангу номуси ватандорӣ ва худшиносии миллӣ ниёз дорад». Фаъолгардонии маърифати ҳуқуқии ҷавонон, ки онро ҷомеаи муосир тақозо менамояд барои Тоҷикистон аз лиҳози мавқеи иқтисодӣ ва демографии он бисёр муҳим арзёбӣ мегардад. Тибқи омори расмӣ беш аз 70 фисади аҳолии кишварро шахсони то 30 сола ташкил медиҳанд, яъне аҳолии Тоҷикистон ҷавон аст ва воқеист, ки аҳолӣ дар кишвар ҳамасола рӯ ба афзоиш дорад.

Аз ин нуқтаи назар, мо ҷавононро мебояд бо дарки баланди масъулият ба ин боварии Асосгузори сулҳу Ваҳдати миллӣ, Пешвои миллат муҳтарам Эмомалӣ Раҳмон ва Ҳукумати Ҷумҳурии Тоҷикистон сазовор бошем ва баҳри таҳкими ваҳдати миллӣ ва пойдории давлати азизамон – Тоҷикистон дар асл саҳмгузор бошем.

Маҳинабону ШАРИПОВА, корманди Кумитаи кор бо ҷавонон ва варзиши назди Ҳукумати Ҷумҳурии Тоҷикистон