Саридораи геологияи назди Ҳукумати Ҷумҳурии Тоҷикистон дар шаш моҳи аввали соли равон ду лоиҳаи Ёддошти тафоҳуми муҳим бо шарикони хориҷӣ ба имзо расонидааст.

Дар ин бора 22 июл сардори Саридораи геология Оймуҳаммадзода Илҳом зимни нишасти хабарӣ хабар дод.

Номбурда ин ду лоиҳаи Ёддошти тафоҳумро муҳим хонд.

- Тибқи қарори Ҳукумати Ҷумҳурии Тоҷикистон аз 16 майи соли равон лоиҳаи Ёддошти тафоҳум оид ба ҳамкорӣ дар соҳаи геология ва истифодаи сарватҳои зеризаминӣ байни Саридораи геология ва Шӯрои таҳқиқотӣ ва инноватсия дар шахси Хадамоти геологии Британия маъқул дониста шуда, он 19 майи соли равон дар шаҳри Лондони Британияи Кабир ва Ирландияи Шимолӣ ба имзо расонида шуд, - қайд намуд номбурда.

Ҳамзамон, Оймуҳаммадзода зикр кард, ки Ёддошти тафоҳуми дигар байни Саридораи геолония ва Институт оид ба илми замин ва захираҳои минералии Ҷумҳурии Корея ба имзо расонида шудааст.

Ба гуфтаи ӯ, дар доираи ин лоиҳаҳо дар назар аст, ки маркази илмию аналитикӣ таъсис дода шавад. Таъсиси чунин марказ барои омода кардани кадрҳо мусоидат хоҳад кард.

Ф. УМАРАЛӢ, “ҶТ”