Мунтахаби наврасони Тоҷикистон дар даври чорякниҳоии Ҷоми осиё-2025 бо дастаи Кореяи Ҷанубӣ рақобат менамояд.

Ин дидор имрӯз - 14 апрел дар варзишгоҳи “Шоҳзода Абдуллоҳ Ал-Файсал Спортс Сити”-и шаҳри Ҷидда баргузор шуда, соати 20:15 ба вақти маҳаллӣ (соати 22:15 ба вақти Душанбе) оғоз мешавад.

Ёдовар мешавем, ки дастаи мунтахаби футболи наврасони то 17-солаи Тоҷикистон дар бозии қаблии худ тими Эронро бо ҳисоби 3:1 шикаст дода, ба даври чорякниҳоии Ҷоми Осиё роҳ ёфт ва соҳиби роҳхат ба Ҷоми ҷаҳон-2025 гардид.

Ҳамин тариқ, дастаи мунтахаби наврасони Тоҷикистон зери раҳбарии сармураббӣ Марко Раҷини, мутахассиси итолиёӣ, дар гурӯҳи “D” бо 6 имтиёз мақоми аввалро касб кард.

Бояд зикр намуд мунтахаби наврасони Тоҷикистон (U-17) бори сеюм дар таърихи худ ба қисми ниҳоии мусобиқоти қаҳрамонии ҷаҳон роҳ ёфт. Қаблан наврасони тоҷик дар Ҷоми ҷаҳон дар Кореяи Ҷанубӣ (соли 2007) ва Бразилия (соли 2019) ширкат карда буданд.