Бахшида ба 33-солагии таъсисёбии Қувваҳои Мусаллаҳи Ҷумҳурии Тоҷикистон дар толори Театри мусиқӣ-мазҳакавӣ ба номи Ато Муҳаммадҷонови шаҳри Бохтар бо иштироки доираи васеи афсарону сарбозон, намояндагони сохторҳои давлатӣ ва аҳли фарҳанг чорабинии тантанавӣ баргузор гардид.

Дар ин бора аз Раёсати кор бо ҷавонон ва варзиши вилояти Хатлон иттилоъ доданд.

Ба иттилои марказ, дар ҳамоиш Абдулло Раҳмонзода, муовини раиси вилояти Хатлон, роҳбарони мақомоти ҳифзи ҳуқуқи вилоят, афсарону сарбозони гарнизони Хатлон ва дигар меҳмонон иштирок намуданд.

Чорабинӣ бо сухани ифтитоҳии Абдулло Раҳмонзода оғоз гардида, зикр кард, ки Қувваҳои Мусаллаҳ давоми 33 сол ба сипари боэътимод ва қувваи муҳимтарини ҳифзи истиқлолу суботи кишвар табдил ёфт.

Ҳамзамон, зикр гардид, ки хизмат дар сафи Қувваҳои Мусаллаҳ мактаби мардонагӣ, ватандӯстӣ ва садоқат ба Ватан буда, он дар тарбияи насли ҷавон нақши калидӣ дорад.

Сипас, ба хотири гиромидошти шаҳидони роҳи Ватан дақиқаи хомӯшӣ эълон карда шуд.

Дар ҳамин замина, ба як қатор афсарону сарбозони фаъоли гарнизони Хатлон, ки дар хизмати ҳарбӣ содиқона фаъолият карданд, сипоснома ва туҳфаҳои раиси вилояти Хатлон супурда шуд.

Қисмати фарҳангӣ бо иштирок ва ҳунарнамоии санъаткорони вилоят ба чорабинӣ ҳусни дигар бахшид.

Фарзонаи УМАРАЛӢ, “ҶТ”