Имрӯз дар шаҳри Хуҷанд бахшида ба Рӯзи варзишгарон, ки он ҳамсола 10 август таҷлил мегардад, чорабинии идона баргузор гардида, зимни он устодони варзиш, собиқадорони соҳа ва варзишгарон қадрдонӣ шуданд.

Раҷаб Аҳмадзода, раиси вилояти Суғд дар чорабинии мазкур иштирок ва суханронӣ намуд.

Раиси вилоят таъкид намуд, дар замони соҳибистиқлолӣ бо таваҷҷуҳ ва дастгириҳои пайвастаи Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон барои рушди ҳамаҷонибаи соҳаи варзиш ва тарбияи ҷисмонӣ замина гузошта шуд. Дар натиҷаи ин ғамхориҳо варзишгарони тоҷик дар чорабиниҳои варзишии сатҳи ҷаҳонӣ иштирок намуда, парчами давлатиро парафшон менамоянд.

Гуфта шуд, ки варзишгарони вилояти Суғд дар шаш моҳи соли равон ба гирифтани 451 медали тилло, 442 медали нуқра ва 629 медали биринҷӣ мушарраф гардиданд, ки ин натиҷаи таваҷҷуҳи хоссаи Пешвои миллат муҳтарам Эмомалӣ Раҳмон ба соҳаи варзиш аст.

Дар чорабинӣ ба варзишгарон, устодони варзиш ва собиқадорони соҳа сипосномаҳои Мақомоти иҷроияи ҳокимияти давлатии вилояти Суғд ва маблағҳои пулӣ тақдим карда шуд. Варзишгарон барои ин таваҷҷуҳ ва ғамхорӣ ба Пешвои миллат муҳтарам Эмомалӣ Раҳмон миннатдорӣ баён намуданд.

Дар охир барномаи рангини аҳли фарҳанг ба чорабинӣ шукуҳи хосса бахшид.

Субҳиддин ҚОДИРОВ, “ҶТ”