Маркази миллии зиддидопингии Тоҷикистон ва Агентии зиддидопингии Ҷумҳурии Корея (KADA) Ёддошти тафоҳумро ба имзо расониданд, ки марҳилаи нави ҳамкориҳои байналмилалиро дар самти мубориза бо допинг ва таҳкими арзишҳои варзиши пок оғоз мекунад.

Ин санад ҳамчун як қадами муҳим дар роҳи таҳкими низоми миллии зиддидопингии Тоҷикистон арзёбӣ шуда, барои густариши ҳамкориҳои байналмилалӣ дар ин самт заминаи мусоид фароҳам меорад. Дар доираи он татбиқи лоиҳаи муштараки K-Lean Together Program – Testing & Analysis Support Project пешбинӣ шудааст, ки ба такмили низоми назорати допинг, баланд бардоштани сатҳи тахассусии мутахассисон ва ҷорӣ намудани таҷрибаҳои пешқадами ҷаҳонӣ равона шудааст.

Тибқи ин ҳамкорӣ, ҷониби Корея ба Маркази миллии зиддидопингии Тоҷикистон дастгирии амалӣ мерасонад. Аз ҷумла, бо ҷалби коршиносони байналмилалӣ тренингҳои махсус оид ба тартиби дурусти гирифтани намунаҳои допинг баргузор хоҳанд шуд.

Ин омӯзишҳо ба мутахассисони тоҷик имконият медиҳанд, ки дониш ва малакаи худро мутобиқ ба талаботи Кодекси ҷаҳонии зиддидопинг ва стандартҳои байналмилалии World Anti-Doping Agency такмил диҳанд.

Ҳамзамон, Озмоишгоҳи назорати допинги Институти илм ва технологияҳои Ҷумҳурии Корея (KIST) таҳлили намунаҳои допингро анҷом медиҳад. Ин иқдом ба баланд бардоштани сифат ва самаранокии фаъолияти зиддидопингӣ дар Тоҷикистон мусоидат намуда, заминаи боэътимод барои назорати шаффоф ва муассир фароҳам месозад.

Ба гуфти масъулин, татбиқи ин Ёддошти тафоҳум дар рушди варзиши пок, таҳкими эътимод ба барномаи миллии зиддидопингӣ ва ҳифзи ҳуқуқу манфиатҳои варзишгарони поквиҷдон нақши муҳим хоҳад гузошт.

Дар баробари ин, Созмони минтақавии зиддидопингии Осиёи Марказӣ (RADOCA) низ дар ҳамоҳангсозӣ ва дастгирии техникии татбиқи лоиҳа саҳми назаррас мегузорад.

Яҳё МАҲМАДНАБИЕВ, “ҶТ”