Соли 2024 зимни гузаронидани санҷишҳо ба миқдори 1 011 801 кг (соли 2023 -юм 1 436 643 кг) маҳсулоти гуногуни пастсифати ғизоӣ ба қайд гирифта шудааст, ки 889 309 кг-и ин маҳсулот аз ҷиҳати бехатарӣ ва 122 492 кг-и дигар аз рӯи тамғагузорӣ дар борҷомаашон ба талабот ҷавобгӯ набудаанд.

Дар ин бора Темурҷон Абдулвахобзода, директори Агентии стандартизатсия, метрология, сертификатсия ва нозироти савдои назди Ҳукумати Ҷумҳурии Тоҷикистон 3-юми феврал зимни нишасти матбуотӣ иттилоъ дод.

- Тибқи хулосаи озмоишгоҳҳои ташхисии маҳсулоти ғизоии Агентии Тоҷикстандарт аз рӯи сифату бехатарӣ ва тамғагузорӣ 50 906 кг маҳсулоти гӯштӣ, 157 111 кг равғани растанӣ, 27 434 литр нӯшокиҳои спиртӣ, 16 284 литр нӯшокиҳои ғайриспиртӣ, 24 159 кг маҳсулоти қаннодӣ, 14 802 кг маҳсулоти ширӣ, 352 кг иловагиҳои ғизоӣ, 6478 кг тухми мурғ, 134 008 кг намак, 101 923 кг маҳсулоти ғалладонагӣ, 140 284 кг орд, 16 599 кг консерва ва дигар маҳсулот, ки дар бозори дохилӣ ошкор гардиданд, ғайристандартӣ ҳисобида шуда, нисбат ба фурӯшандагони ин маҳсулот чораҳои зарурӣ андешида шуданд, - гуфт Темурҷон Абдулвахобзода.

Номбурда ҳамчунин қайд кард, ки дар соҳаи баҳодиҳии мутобиқат дар давоми соли 2024 дар ҷумҳурӣ нисбат ба 44 100 партия молу маҳсулот, аз ҷумла, 32 088 партия молу маҳсулоти воридотӣ, 2889 партия молу маҳсулоти содиротӣ ва 9123 партия молу маҳсулоти истеҳсоли ватанӣ корҳои сертификатсионӣ гузаронида шуда, ба ин молу маҳсулот сертификати мутобиқат дода шуд.

Ҳошим РАҲМАТУЛЛОЕВ, “ҶТ”