Имрӯз дар Кумитаи миллии олимпии Тоҷикистон маросими гусели ҳайати варзишии кишвар ба Бозиҳои 4-уми олимпии наврасон баргузор гардид. Ин мусобиқаи байналмилалӣ аз 31 октябр то 13 ноябри соли 2026 дар пойтахти Сенегал шаҳри Дакар доир мегардад.

Дар маросими гусел намояндагони соҳаи варзиш ва масъулони соҳа иштирок намуда, ба варзишгарони ҷавони тоҷик барои ҳимояи шарафи кишвар дар арсаи байналмилалӣ барору комёбӣ таманно карданд.

Тавре иттилоъ дода шуд, ҳайати Тоҷикистонро дар ин мусобиқа 11 нафар-шаш варзишгар, чор мураббӣ ва як сардори даста, намояндагӣ мекунанд.
Дар оғози чорабинӣ котиби генералии Кумитаи миллии олимпии Тоҷикистон Муҳаммадшо Абдуллозода ва сардори раёсати варзишии Кумитаи кор бо ҷавонон ва варзиши назди Ҳукумати Ҷумҳурии Тоҷикистон Давлат Суфизода суханронӣ намуда, ба ҳайати кишвар дар мусобиқаи дарпешистода муваффақият орзу карданд. Онҳо муҳимияти иштирок дар чунин чорабиниҳои сатҳи байналмилалиро барои такмили маҳорати варзишгарони ҷавон ва андӯхтани таҷрибаи мусобиқавӣ таъкид намуданд.

Дар идомаи маросим Шариф Асмар парчамбардори ҳайати Тоҷикистон дар Бозиҳои 4-уми олимпии наврасон интихоб гардид. Бояд гуфт, ки Бозиҳои олимпии наврасон яке аз чорабиниҳои муҳими варзишии сатҳи ҷаҳонӣ буда, таҳти сарпарастии Кумитаи байналмилалии олимпӣ баргузор мешаванд. Ин бозиҳо барои варзишгарони ҷавон имконият фароҳам меоранд, ки дар рақобат бо ҳамсолони худ аз кишварҳои гуногун маҳорати касбиашонро санҷида, таҷрибаи байналмилалӣ андӯхта ва барои расидан ба қуллаҳои баланди варзишӣ қадамҳои устувор гузоранд.

Бозиҳои имсола дар Дакар аҳамияти хос доранд, зеро бори нахуст дар таърих қитъаи Африқо мизбони Бозиҳои олимпии наврасон мегардад. Ин рӯйдод барои рушди ҳаракати олимпӣ ва густариши имкониятҳои варзишӣ дар минтақа низ муҳим арзёбӣ мешавад. Ба барномаи мусобиқа 25 намуди варзиш шомил буда, интизор меравад, ки тақрибан 3000 варзишгари то 17-сола аз кишварҳои гуногуни ҷаҳон дар он иштирок намоянд.

Тибқи маълумоти Кумитаи миллии олимпии Тоҷикистон, имсол низоми интихоби варзишгарон барои иштирок дар ин мусобиқа тағйир ёфтааст. Агар қаблан иштирокчиён тавассути гирифтани роҳхат муайян мешуданд, акнун интихоби варзишгарон аз ҷониби федератсияҳои байналмилалӣ дар асоси раддабандии ҷаҳонӣ сурат мегирад. Ин тартиб барои варзишгарон рақобати бештар эҷод намуда, зарурати нишон додани натиҷаҳои устуворро дар мусобиқаҳои байналмилалӣ тақвият мебахшад.

Иштироки ҳайати Тоҷикистон дар Бозиҳои 4-уми олимпии наврасон имкони муҳим барои муаррифии иқтидори варзиши кишвар, такмили таҷрибаи рақобатӣ ва муайян намудани дурнамои варзишгарони ҷавон ба шумор меравад. Ҳоло таваҷҷуҳи асосӣ ба омодагии ҳамаҷонибаи ҳайат ва иштироки муваффақонаи намояндагони кишвар дар ин мусобиқаи бонуфуз равона шудааст.

Яҳё МАҲМАДНАБИЕВ, “ҶТ”