Имрӯз, 7 апрел бо мақсади пуршукӯҳ доир шудани чорабинии байналмилалӣ дар доираи баргузории рӯзи дуюми Форуми минтақавии Шурои олимпии Осиё ва ҳамбастагии олимпӣ барои кумитаҳои миллии олимпии Осиёи марказӣ ва Ғарб, дар шафати Кули ҷавонони пойтахт миёни иштирокчиёни Форум “Дави дӯстӣ” доир гардид.

Дар ин бора маркази таҳлил ва иттилооти Кумитаи кор бо ҷавонон ва варзиши назди Ҳукумати кишвар хабар додааст.

Бино ба иттилои манбаъ, “Дави дӯстӣ” баҳри дилхушӣ бо иштироки ҳайати расмии кишвари Тоҷикистон, намояндагони ҳайатҳои 22 кишвари иштирокдори Форум ва ҷавонони фаъоли назди Кумитаи кор бо ҷавонон ва варзиши мамлакат баргузор шуд.

Дар маросими ифтитоҳ таъкид гардид, ки мақсад аз ташкили “Дави дӯстӣ” тарғиби тарзи ҳайёти солим, оммавигардонии варзиш ва таҳкими дӯстӣ миёни ҳайатҳои иштирокчии ин чорабинии бошукӯҳи байналмилалӣ маҳсуб меёбад.

Тибқи иттилоъ, дар доираи ин чорабинии варзишӣ аз ҷониби тадорукот чанде аз ҷавонони фаъол ва ғолибони озмунҳое, ки дар самтҳои алоҳида раёсати Форум баргузор намуд, дар фазои тантанавӣ бо шаҳодатнома, медал ва дигар туҳфаҳои хотиравӣ қадрдонӣ шуданд.