Бахшида ба ёдбуди кормани Шоистаи Ҷумҳурии Тоҷикистон Қувват Холов дар Муассисаи давлатии "Маркази ҷумҳуриявии тайёрии олимпии дастаҳои мунтахаб" дар шаҳри Душанбе мусобиқаи кушоди ҷумҳуриявӣ аз намуди гӯштини тарзи озод оғоз гардид.

Дар он 350 паҳлавон аз сартосари Ҷумҳурии Тоҷикистон ва Ҷумҳурии Қирғизистон дар 17 вазн (аз 23 то 110 кило) миёни ҳам рақобат мекунанд.

Мусобиқа давоми ду рӯз идома ёфта, варзишгарони солҳои таввалудашон 2001-2003, 2004-2007 барои ғолибият мубориза мебаранд.

Абдурозиқ Олимов, сармураббии тими мунтахаби кишвар оиди гӯштини тарзи озод мақсади баргузории мусобиқаро оммавияти варзиш миёни ҷавонону наврасон унвон кард:

- Мақсад аз гузаронидани мусобиқаи мазкур тарғиби наврасону ҷавонон ба варзиш ва омода намудани паҳлавонони наврас дар риштаи гӯштин мебошад. Мо ҳар қадар чунин мусобиқаҳоро зиёд гузаронем, ҳамон қадар баҳри омода шудани варзишгарон дар мусобиқаҳои сатҳи байналмилалӣ мусоидат мекунад. Зеро дар баробари Бозиҳои олимпӣ миёни калонсолон варзишгарони наврас низ барои роҳхат ба Бозиҳои олимпӣ сол аз сол мушкил гашта истодааст ва мусобиқаҳои мазкур як марҳилаи омодашавии варзишгарон ба мусобиқаҳои байналмилалист,- гуфт Абдурозиқ Олимов.

Ёдовар бояд шуд, ки мусобиқаи мазкур соли панҷум аст, ки бо ташаббуси Кумитаи кор бо ҷавонон ва варзиш гузаронида шуда, ғолибон бо медалу ифтихорнома ва туҳфаҳои хотиравӣ қадр карда мешавад.