20 сентябр дастаи мунтахаби футзали Тоҷикистон дар рақобатҳои даври якуми марҳилаи интихобии Ҷоми Осиё-2026 дар гурӯҳи “С” дарвозаи тими миллии Макаоро голборон кард.

Рақобати дастаҳо дар Қасри теннис ва маҷмааи варзиши обии шаҳри Душанбе доир гардида, бо ҳисоби бузурги 10:2 ба нафъи мунтахабчиёни Тоҷикистон хатм гардид. Футзалбозони тоҷик дар нимаи аввали бозӣ ба дарвозаи меҳмонон чаҳор голи беҷавоб заданд. Дар нимаи дуюми дидор мизбонон шаш гол ва футзалбозони Макао ду гол ба самар расонданд.

Пайрав Воҳидов, сармураббии тими миллии футзали Тоҷикистон ба ҳайати тим бозингарони зеринро ворид намуда буд:
Дарвозабонҳо: Фирӯз Бекмуродов, Нуриддин Ҷабборов, Фирӯз Бозмамадов;

Бозингарони майдонӣ: Дилшод Саломов, Идрис Ёров, Самандар Ризомов, Некрӯз Идиев, Насратшо Исмоилов, Муҳаммад Раҷабов, Муҳаммадҷон Шарипов, Бахтиёр Солиев, Хусрав Холиқназаров, Умед Қузиев, Баҳодур Хоҷаев.

Ба фарқ аз рақобатҳои дигари тими мунтахаби кишвар дар ин дидор бозингари бомаҳорати тими миллии футзали Тоҷикистон Файзали Сардоров ба ҳайат даъват нашуда буд.

Пайрав Воҳидов оид ба ҳайати Тоҷикистон даъват нашудани Файзалӣ Сардоров дар бозиҳои интихобии Ҷоми Осиё -2026 андешаҳои хешро ба таври зайл баён дошт:

"Файзалӣ Сардоров дар се ҷамъомаде, ки мо дар соли 2025 доштем, ширкат надошт. Вақте ки бозингар ба тими мунтахаб даъват мешавад, бояд омада иштирок намояд. Аммо вақте бозингар беэътиноӣ нисбати тими мунтахаб мекунад ва ҳозир намешавад, аз ҳамин сабаб даъват намегардад.

Ба назари коршиносон мумкин будани Сардоров дар ҳайат фоидаи зиёд дошта бошад, лекин ба назари мо, таҳлил кардем ва ман розӣ нестам, ки агар Файзалӣ Сардоров набошад, пас бозии тими мунтахаб заиф аст. Вақте мо бозингарро ба тими мунтахаб даъват мекунем, бояд дар ҳама ҳолат ҳозир бошад. Дар тими мунтахаб бозингар ватанамонро муаррифӣ мекунад. Агар бозингар дар 3-4 тамринҳои тими меҳан ширкат наварзад, барои чӣ даъват кунем?!".

Ба замми набудани Сардоров, ки ҳамчун футболбози бозисози тими мунтахаб унвон мешавад, рақобати бозингарон шоистаи таҳсин буд.

Дар бозии дигари даври якум дар гурӯҳи “С” тими миллии Ҷопон бар дастаи мунтахаби Камбоҷа бо ҳисоби 5:0 ғалаба кард.
Дар даври дуюми марҳилаи интихобии Ҷоми Осиё-2026 дар гурӯҳи “С” мунтахаби Тоҷикистон бо Камбоҷа рақобат мекунад. Ин бозӣ 22-юми сентябр дар Қасри теннис ва маҷмааи варзиши обии шаҳри Душанбе соати 20:00 оғоз меёбад. Пеш аз ин дидор тимҳои миллии Макао ва Ҷопон (соати 17:00) вориди рақобат мешаванд.

Пайрав Воҳидов, сармураббии тими миллии футзали Тоҷикистон гуфт: “дар муқоиса бо Ҷоми ҷаҳон-2024 дар ҳайати даста каме тағйирот ворид кардем. Мақсади мо баромадан ба қисми ниҳоии мусобиқот мебошад. Соли гузашта дар гурӯҳи худ ҷойи якумро гирифтем ва кӯшиш мекунем, ки ин натиҷаро такрор намоем”.

Бояд гуфт, ба қисми ниҳоии Ҷоми Осиё, ки аз 27-уми январ то 7-уми феврали соли 2026-ум дар Индонезия доир мегардад, ғолибони ҳашт гурӯҳи интихобӣ ва ҳафт дастаи беҳтарини ҷойҳои дуюм роҳ меёбанд.

Яҳё МАҲМАДНАБИЕВ, “ҶТ”