14 июн дар Варзишгоҳи марказии шаҳри Душанбе мусобиқаи кушоди байналмилалӣ оид ба варзиши сабук барои дарёфти Ҷоми қаҳрамонони Бозиҳои олимпӣ, Дилшод Назаров ва Андрей Абдувалиев баргузор гардид.

Ин чорабинии варзишӣ бо иштироки муовини Кумитаи кор бо ҷавонон ва варзиши назди Ҳукумати Ҷумҳурии Тоҷикистон, Шокирзода Муҳаммадтолиб ва як қатор намояндагон ва масъулини соҳаи варзиш доир шуд.

Маврид ба зикр аст, ки дар ин мусобиқаи варзишӣ як қатор варзишгарон аз Узбекистон, Қирғизистон, Туркманистон, Қазоқистон ва Тоҷикистон иштирок карданд. Варзишгарони тоҷик бо касби 23 медал мақоми аввалро дар ин мусобиқа аз они худ карданд.

Мавриди ёдоварист, ки чорабинӣ бо мақсади тарғибу ташвиқи соҳаи варзиш, дарёфт ва рушди истеъдодҳо, тақвият бахшидани дӯстии кишварҳо баргузор гардид.

Дар идома варзишгарон бо намудҳои гуногуни варзиш бо ҳам рақобат карданд ва ҳамзамон, як қатор чорабиниҳои фарҳангӣ низ баргузор гардид, ки руҳияи иштирокчиён ва тамошобинонро шоду масрур намуд.

Сафиаллоҳ ИБОДЗОДА, "ҶТ"