Варзишгарони тоҷик дар нахустин иштироки санъати муҳорибаҳои омехта (ММА) дар барномаи Бозиҳои осиёӣ натиҷаи назаррас ба даст оварданд. Дар мусобиқаи Бозиҳои XX осиёӣ дар Айчи-Нагояи Ҷопон Отабек Раҷабов дар вазни то 65 килограмм аз рӯйи Traditional MMA ба гирифтани медали тилло ва Беҳрӯз Хуршедзода дар вазни то 71 килограмм аз рӯйи Modern MMA ба гирифтани медали нуқра мушарраф шуданд.

Отабек Раҷабов барои роҳ ёфтан ба финал дар марҳилаи нимниҳоӣ бар намояндаи Қазоқистон Санжар Одилов бо ҳисоби 3:0 пирӯз шуд. Дар рақобати ниҳоӣ паҳлавони тоҷик бо намояндаи Филиппин Жан Клод Саклаг рӯ ба рӯ шуда, бо ҳисоби 3:0 ғалаба кард ва унвони қаҳрамони Бозиҳои осиёӣ-2026 соҳиб гардид.

Барои Беҳрӯз Хуршедзода роҳи расидан ба финал низ осон набуд. Дар нимфинал ӯ бо намояндаи Қирғизистон Юрускелди Дуйшев рақобат кард. Дар ибтидо ғолибият ба варзишгари қирғиз дода шуд, аммо ҳайати Тоҷикистон ба қарори доварон эътироз пешниҳод намуд. Пас аз баррасии шикоят натиҷа тағйир дода шуда, пирӯзӣ бо ҳисоби 3:0 ба Хуршедзода дода шуд ва ӯ ба финал роҳ ёфт.

Дар рақобати ниҳоӣ Хуршедзода бо намояндаи Қазоқистон Қодирбек Шинбоев нерусанҷӣ кард ва дар натиҷа бо медали нуқра мусобиқаро ҷамъбаст намуд. Қодирбек Шинбоев қабл аз ин дар нимфинал бар намояндаи Ӯзбекистон Нодирбек Шавкатов бо ҳисоби 3:0 пирӯз шуда, ба финал роҳ ёфта буд.

Яҳё МАҲМАДНАБИЕВ, “ҶТ”