Дар деҳаи Ғезани ҷамоати деҳоти Моғиёни шаҳри Панҷакент бахшида ба Рӯзи ҷавонони Тоҷикистон, Рӯзи ҷаҳонии футбол ва 35-солагии Истиқлоли давлатӣ майдончаи нави варзишӣ ба истифода дода шуд.

Дар маросими ифтитоҳи иншооти варзишӣ намояндаи Ҳукумати Ҷумҳурии Тоҷикистон, президенти Академияи миллии илмҳои Ҷумҳурии Тоҷикистон академик Қобил Хушвақтзода ва раиси шаҳри Панҷакент Абдухолиқ Холиқзода иштирок карданд.

Зимни суханронӣ таъкид гардид, ки бунёди чунин иншоотҳои варзишӣ барои фароҳам овардани шароити мусоид ҷиҳати машғул шудани наврасону ҷавонон ба варзиш, тарғиби тарзи ҳаёти солим ва рушди инфрасохтори иҷтимоӣ аҳамияти муҳим дорад.
Масъулин иброз доштанд, ки дар доираи сиёсати созандаи Президенти Ҷумҳурии Тоҷикистон муҳтарам Эмомалӣ Раҳмон дар саросари кишвар корҳои ободониву созандагӣ густариш ёфта, бунёди майдончаҳои варзишӣ ва дигар иншооти иҷтимоӣ ҳамчун омили муҳими дастгирии ҷавонон ва рушди ҷомеа идома дорад.

Майдончаи нави варзишӣ бо шароити муосир муҷаҳҳаз буда, барои баргузории машғулиятҳои варзишӣ ва ҷалби бештари ҷавонону наврасон ба тарзи ҳаёти солим имконият фароҳам меорад.

Я. МАҲМАДНАБИЕВ, “ҶТ”