13 май мунтахаби ҷавонони то 20-солаи Тоҷикистон таҳти роҳбарии мутахассиси тоҷик Рустам Хоҷаев иштироки худро дар чемпионати Ассотсиатсияи футболи Осиёи Марказӣ (CAFA) бо ғалабаи муҳим муқобили тими Туркманистон оғоз намуд.

Дидори дастаҳо дар Варзишгоҳи марказии шаҳри Ҳисор баргузор гардида, бо ҳисоби 2:1 ба суди ҷавонони тоҷик анҷом ёфт.
Бозӣ барои ҳар ду даста аҳамияти махсус дошт. Мунтахаби Тоҷикистон нахустин бозии худро дар мусобиқот анҷом медод, дар ҳоле ки тими Туркманистон баъди пирӯзӣ бар Афғонистон бо руҳияи баланд вориди майдон шуда буд. Аз ин рӯ, вохӯрӣ бо муборизаи шадид ва рақобати ҷиддӣ ҷараён гирифт.

Қисми аввали бозӣ бо бартарии нисбии футболбозони тоҷик сипарӣ гардид. Шогирдони Рустам Хоҷаев бештар ташаббусро дар даст дошта, барои рахна кардани хати дифои ҳариф кӯшиш мекарданд, аммо дар лаҳзаҳои ҳалкунанда дақиқият намерасид. Дар навбати худ футболбозони Туркманистон бештар ба ҳамлаҳои ҷавобӣ такя намуда, чандин бор вазъияти голзаниро ба вуҷуд оварданд.

Ҳисоб танҳо дар қисми дуюми бозӣ боз шуд. Дар дақиқаи 60-уми рақобат футболбози тими Туркманистон Дияргулюч Уразов аз имконияти муносиб истифода бурда, меҳмононро ба пеш баровард. Гол вазъияти бозиро барои мунтахаби Тоҷикистон душвор намуд ва даста маҷбур шуд барои наҷоти бозӣ бештар ба ҳамла гузарад.

Пас аз гол футболбозони тоҷик фишорро зиёд карданд ва дар дақиқаҳои охир муваффақ шуданд натиҷаро барқарор намоянд. Дар дақиқаи 84-ум довар ба фоидаи Тоҷикистон зарбаи ёздаҳметра таъин кард ва Аҳмадҷон Шоев бо зарбаи дақиқ ҳисобро баробар намуд.

Вақте аксарият интизори анҷоми мусовии бозӣ буданд, мунтахаби Тоҷикистон ҳамлаи ҳалкунанда анҷом дод. Дар дақиқаи 90+7 нимҳимоятгари дастаи Барқчӣ Мусо Қаҳоров бо зарбаи зебо тӯбро вориди дарвозаи ҳариф намуда, ғалабаи драмавии мунтахаби Тоҷикистонро таъмин кард. Бозии зебои ӯ дур аз назар намонд ва беҳтарин футболбози вохӯрӣ эълон гардид.
Ин пирӯзӣ барои мунтахаби ҷавонони Тоҷикистон аз ҷиҳати руҳӣ ва ҷадвалӣ аҳамияти калон дорад. Шогирдони Рустам Хоҷаев мусобиқотро бо се имтиёз оғоз намуда, барои идомаи мубориза дар гурӯҳ мавқеи хуб касб карданд.

Ёдовар мешавем, ки дар даври навбатии чемпионати CAFA мунтахаби Тоҷикистон рӯзи 15-уми май бо тими Афғонистон рақобат мекунад. Ин дидор дар варзишгоҳи Талко-Арена баргузор мешавад. Дар бозии дигари давр Туркманистон бо Қирғизистон неру месанҷад.

Яҳё МАҲМАДНАБИЕВ, “ҶТ”