Шоми 15 сентябр дар корти тенниси майдончаҳои тобистонаи Корхонаи воҳиди давлатии “Роҳи оҳани Тоҷикистон” бо ҳузури роҳбарону намояндагони вазорату идораҳои давлативу ҷамъиятӣ, меҳмонони хориҷӣ ва ҳаводорону дӯстдорони варзиши теннис маросими ифтитоҳи Мусобиқаи XV - уми байналмилалӣ оид ба теннис барои дарёфти “Ҷоми Президенти Ҷумҳурии Тоҷикистон” доир шуд.

Тибқи иттилои маркази таҳлил ва иттилооти Кумитаи кор бо ҷавонон ва варзиш, дар мусобиқаи мазкур 60 варзишгар ва беҳтарин ҳайатҳои даставии теннисбозон аз 13 давлати ҷаҳон, аз ҷумла Тоҷикистон, Русия, Чин, Эрон, Амрико, Арабистони Саудӣ, Покистон, Кореяи Ҷанубӣ, Қазоқистон, Узбекистон, Туркманистон, Қирғизистон ва Федератсияи байналмилалии теннис иштирок менамоянд.

Дар маросими ифтитоҳи расмии мусобиқа Абдулло Раҳмонзода, Ёрдамчии Президенти Ҷумҳурии Тоҷикистон оид ба масъалаҳои рушди иҷтимоӣ ва робита бо ҷомеа ва Зулфиқор Гулаҳмадзода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон суханронӣ намуда, зимни он меҳмонону варзишгаронро хайрамақдам гуфта, ҳамзамон аз таваҷҷуҳ ва ғамхориҳои доимии Ҳукумати мамлакат, хосса Президенти Ҷумҳурии Тоҷикистон муҳтарам Эмомалӣ Раҳмон нисбат ба рушди соҳаи тарбияи ҷисмонӣ ва варзиш ёдовар шуданд.

Иброз гардид, ки соҳаи тарбияи ҷисмонӣ ва варзиш яке аз рукнҳои арзишмандтарин ва муҳимтарини ҷомеа барои тарбияи насли наврас ва инсоният ба ҳисоб меравад. Зеро мақсади асосии тарбияи ҷисмонӣ ва варзиш танҳо иборат аз таҳкими саломатии инсон нест, балки он бо тарбияи меҳнатӣ, ақлӣ, ахлоқӣ ва эстетикӣ низ пайванди ногусастанӣ дошта, муаррифгари давлату миллат дар арсаи байналмилалӣ мебошад.

Ба гуфти масъулин ҳадафи баргузории мусобиқаи байналмилалӣ муттаҳид намудани варзишгарон дар риштаи теннис ва рушди ин навъи варзиш дар мамлакат арзёбӣ мегардад.

Бино ба хабар, мусобиқаи мазкур то 18 сентябр идома ёфта, ғолибону ҷоизадорон дар охир бо ҷом ва мукофотҳои арзишманд қадршиносӣ мегарданд.

“ҶТ”