2 октябр дар шаҳри Истаравшани вилояти Суғд 8 нафар иштирокчии фаъоли даври сеюми озмуни ҷумҳуриявии “ТАРАННУМИ ВАТАН” аз тарафи бахши кор бо ҷавонон ва варзиши шаҳр дар доираи як чорабинии идона қадрдонӣ карда шуданд.

Дар чорабинии мазкур муовини раиси шаҳри мазкур Парвиз Зафарзода, мудири бахши кор бо ҷавонон ва варзиши шаҳр Шаҳзод Рауфов, раиси бахши истаравшании Иттифоқи нависандагон Раъно Зоирдухт иштирок намуда, 8 нафар иштирокчии ин озмуни ҷумҳуриявиро аз шаҳри Истаравшан бо ифтихорнома ва туҳфаҳои хотиравӣ сарфароз гардониданд.

Ёдовар мешавем, ки даври сеюми озмуни ҷумҳуриявии “ТАРАННУМИ ВАТАН” бо ташаббуси Кумитаи кор бо ҷавонон ва варзиши назди Ҳукумати Ҷумҳурии Тоҷикистон ба муносибати ҷашни Истиқлоли давлатӣ давоми се моҳ – июн, июл ва августи соли ҷорӣ аз рӯи ду синну сол – қироати шеър миёни наврасони то 14-сола ва аз 14-сола боло баргузор гардид.

Мақсад аз баргузории озмун боло бурдани ҳисси худшиносии сокинон, тарғиб ва тарбияи эҳсоси ватандӯстӣ дар замири ҳар як фарди кишвар, ҳифзи якпорчагии марзу бум, ваҳдати сартосарӣ, ифтихор аз Истиқлоли давлатӣ ва дарёфту ҳавасманд намудани истеъдодҳои наврасу ҷавон мебошад.

Ёдрас мешавем, ки фардо, 3 октябр ғолибони ҷойҳои аввал, дуюм ва сеюми ҳарду номинатсия ва иштирокчиёни ҷойҳои ифтихории озмуни мазкур дар Кохи Суруши шаҳри Душанбе қадрдонӣ хоҳанд шуд.

Инчунин, тамоми иштирокчиёни дигари озмун, ки холҳои заруриро нагирифтаанд, барои танҳо иштирокашон аз тарафи раёсат ва бахшҳои маҳаллии Кумитаи кор бо ҷавонон ва варзиш қадрдонӣ карда хоҳанд шуд.

“ҶТ”