Дар доираи чорабиниҳои бахшида ба 29-умин солгарди Рӯзи Ваҳдати миллӣ иштирокчиёни Фестивали ҷумҳуриявии "Дӯстии ҷавонон" сафари худро идома дода, субҳи 26 июн ба шаҳри Роғун ташриф оварданд.

Дар маркази шаҳр иштирокчиёни фестивалро намояндагони мақомоти иҷроияи ҳокимияти давлатии шаҳр бо самимияти хос, фазои идона ва нону ширинӣ истиқбол гирифтанд.
Зимни истиқбол масъулин меҳмононро хайрамақдам гуфта, онҳоро ба муносибати фарорасии Рӯзи Ваҳдати миллӣ самимона табрик намуданд.
Қайд гардид, ки Ваҳдати миллӣ барои мардуми Тоҷикистон арзиши бузурги таърихӣ дорад ва маҳз бо талошҳои Пешвои миллат муҳтарам Эмомалӣ Раҳмон ин неъмати бузург ба даст омадааст.
Иштирокчиёни фестивал дар назди Қасри фарҳанг аз ҷониби раиси шаҳри Роғун Саидзода Сунатулло пешвоз гирифта шуданд. Дар Қасри фарҳанг раиси шаҳр бори дигар иштирокчиёни Фестивали ҷумҳуриявии "Дӯстии ҷавонон"-ро хайрамақдам гуфта, онҳоро ба муносибати Рӯзи Ваҳдати миллӣ табрику таҳният намуд.
Дар суханронии худ раиси шаҳр зикр намуд, ки сулҳу оромӣ ва Ваҳдати миллӣ натиҷаи талошҳои пайвастаи роҳбарияти давлат ва заҳматҳои созандаи мардуми Тоҷикистон мебошад.
Дар анҷоми чорабинӣ кормандони соҳаи фарҳанги шаҳри Роғун бо сурудҳои ватандӯстона ва барномаи фарҳангӣ хотири иштирокчиёни фестивалро шод гардониданд.

М. МУҚАДАМОВА, “ҶТ”