25 – уми сентябр дар толори Кумитаи кор бо ҷавонон ва варзиши назди Ҳукумати Ҷумҳурии Тоҷикистон маросими ифтитоҳи курси ҳаштуми омӯзишии “Ҷавонон - пайравони Пешвои миллат” баргузор гардид. Дар ин марҳила 190 нафар донишҷӯёни муассисаҳои таҳсилоти олии касбӣ ва миёнаи касбии пойтахт ба омӯзиш ҷалб шуданд, ки ин шумора нисбат ба курси қаблӣ як баробар бештар мебошад.

Тибқи иттилои маркази таҳлил ва иттилооти Кумитаи кор бо ҷавонон ва варзиш, маросим таҳти раёсати Зулфиқор Гулаҳмадзода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон, раиси Ташкилоти ҷамъиятии “Пайравони Пешвои миллат” доир шуда, зимни он нафарони масъули ташкилот, ҳайати ҷавонони фаъоли иштирокчии курси навбатӣ ва намояндагони васоити ахбори омма иштирок намуданд.

Нахуст, ҳозирин ба таври зинда Суруди миллиро замзама намуда, ба кори чорабинӣ ҳусни оғоз бахшиданд.

Раиси Кумита дар сухани ифтитоҳии худ таъкид намуд, ки омӯхтани мактаби давлатдорӣ ва таҷрибаи нодири Пешвои муаззами миллат, муҳтарам Эмомалӣ Раҳмон барои ҳар як ҷавон мояи ифтихор ва сабақи зиндагӣ мебошад. Ӯ зикр намуд, ки Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон шахсияти таърихие ҳастанд, ки бо ҷонфидоӣ ва хиради сиёсӣ давлату миллатро ба роҳи сулҳу субот, ваҳдат ва рушд раҳнамун сохтанд.

“Ҷавонони тоҷик бояд дорои дониши сиёсӣ ва ҳисси баланди ватандӯстӣ бошанд. Онҳо бояд аз таърихи пурифтихори миллат огоҳ буда, бо шукргузорӣ аз фазои сулҳу ваҳдат ва истиқлол, барои рушди давлатдорӣ ва ояндаи дурахшони Тоҷикистони азиз саҳм гузоранд”, - гуфт раиси Кумита.

Зимнан, чанде аз ҷавонон суханронӣ намуда, иштирок дар чунин мактаби шахсиятсозиро мояи ифтихор ва садоқати баланди ватандорӣ маънидод намуданд.

Дар доираи курси ҳаштуми омӯзишӣ, ки шаш моҳ идома меёбад, маърӯзачиён аз ҳисоби роҳбарони аввали вазорату идораҳо ва шахсиятҳои шинохта даъват мешаванд. Шунавандагон бо фаъолияти сохторҳои давлатӣ шиносоии наздик пайдо карда, дар анҷом бо шаҳодатнома ва дипломи хатм сарфароз мегарданд.

“ҶТ”