Имрӯз бахшида ба таҷлили Рӯзи ҷавонони Тоҷикистон ва 35-солагии Истиқлоли давлатӣ дар Вазорати нақлиёти Ҷумҳурии Тоҷикистон ҳамоиши ҷавонони соҳаи нақлиёт таҳти унвони “Нақши ҷавонон дар таҳкими Истиқлолияти давлатӣ” бо иштироки намояндагон ва кормандони соҳа баргузор гардид.

Дар чорабинии мазкур вазири нақлиёти Ҷумҳурии Тоҷикистон Азим Иброҳим, муовини раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон Чоршанбезода Сураҷ Сайнак иштирок карда, ҷавононро ба муносибати Рӯзи ҷавонони Тоҷикистон табрику муборакбод намуданд ва оид ба саҳми ҷавонон дар пешрафти кишвар ва татбиқи ҳадафҳои стратегии мамлакат суханронӣ карданд.

Зимни баромадҳо зикр гардид, ки ҷавонон имрӯз ҳамчун неруи созанда ва ташаббускор дар пешбурди сиёсати давлатӣ, махсусан дар рушди инфрасохтори роҳу нақлиёт, татбиқи технологияҳои муосир ва баланд бардоштани сифати хизматрасонӣ нақши муҳим доранд.

Таъкид шуд, ки дар солҳои соҳибистиқлолӣ бо дастгирии Ҳукумати Ҷумҳурии Тоҷикистон ва таҳти роҳбарии хирадмандонаи Президенти Ҷумҳурии Тоҷикистон, муҳтарам Эмомалӣ Раҳмон барои ҷавонон имкониятҳои васеъ ҷиҳати таҳсил, такмили ихтисос ва фаъолият дар бахшҳои муҳими иқтисоди миллӣ, аз ҷумла соҳаи нақлиёт фароҳам оварда шудааст.

Зимни ҳамоиш аз ҷавонон даъват ба амал оварда шуд, ки бо масъулияти баланд, донишҳои муосир ва ҳисси баланди ватандӯстӣ дар татбиқи лоиҳаҳои бузурги роҳсозӣ ва таҳкими нуфузи Тоҷикистон дар арсаи байналмилалӣ саҳмгузор бошанд.
Дар идомаи чорабинӣ ба роҳбарияти Вазорат медали соҳавӣ супорида шуда, ба як қатор кормандони вазорат барои фаъолияти назаррас, ташаббусҳои созанда ва иштироки фаъолона дар ҳаёти ҷамъиятӣ сипоснома тақдим гардид.

Дар охир барномаи рангини ҳунарӣ бо суруду таронаҳои ватандӯстона пешкаш гардид.

“ҶТ”