Имрӯз, 21 май дар толори Раёсати Академияи миллии илмҳои Тоҷикистон бахшида ба Рӯзи ҷавонони Тоҷикистон дар остонаи 35–солагии Истиқлоли давлатӣ Конференсияи илмӣ-амалӣ таҳти унвони “Нақши олимони ҷавон дар рушди илм, инноватсия, иқтисоди рақамӣ ва таҳкими давлатдории миллӣ” доир шуд.

Дар ин бора аз Академияи миллии илмҳои Тоҷикистон иттилоъ доданд.

Тибқи иттилоъ, дар кори конфронс президенти Академияи миллии илмҳои Тоҷикистон, академик Хушвахтзода Қобилҷон Хушвахт, муовини якуми раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон Шабнам Раҳимзода, сардори Раёсати кор бо ҷавонон ва варзиши шаҳри Душанбе Бобохонзода Раҷабалӣ ва олимони ҷавони муассисаҳои илмӣ-таҳқиқотӣ иштирок ва суханронӣ намуданд.

Президенти Академияи миллии илмҳои Тоҷикистон, академик Хушвахтзода Қобилҷон Хушвахт зимни сухани ифтитоҳии худ таъкид намуд, ки ҷавонон неруи пешбарандаи ҷомеа ва ояндаи миллат ба шумор рафта, саҳми онҳо дар рушди илм, технологияҳои муосир, иқтисоди рақамӣ ва таҳкими пояҳои давлатдории миллӣ ниҳоят муҳим мебошад.

Гуфта шуд, ки маҳз таваҷҷуҳу дастгириҳои пайвастаи Президенти Ҷумҳурии Тоҷикистон муҳтарам Эмомалӣ Раҳмон барои фароҳам гардидани шароити мусоид ҷиҳати таҳсил, пажӯҳиш ва фаъолияти илмии ҷавонон заминаи устувор гузоштааст. Дар ин замина, имрӯз ҷавонон имконият доранд дар муассисаҳои бонуфузи илмӣ ва таҳсилоти олии дохилу хориҷи кишвар ба таҳсил ва таҳқиқоти илмӣ машғул гардида, донишу малакаи худро барои рушди ҷомеа ва давлат сафарбар намоянд.

Шабнам Раҳимзода, муовини якуми раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон дар суханронии хеш қайд намуд, ки сиёсати давлатии ҷавонон дар Ҷумҳурии Тоҷикистон таҳти таваҷҷуҳи доимии давлат ва Ҳукумат қарор дошта, барои ҷавонон дар самти таҳсил, фаъолияти илмӣ, ихтироъкорӣ ва рушди қобилиятҳои зеҳнӣ шароити мусоид фароҳам оварда шудааст.

Зикр гардид, ки ҷавонон ҳамчун қишри фаъоли ҷомеа метавонанд бо донишу ҷаҳонбинии замонавӣ дар рушди илм, татбиқи технологияҳои нав, таҳкими давлатдорӣ ва ҳифзи манфиатҳои миллӣ саҳми арзишманд гузоранд.

Дар интиҳо як зумра олимони ҷавони Академияи миллии илмҳои Тоҷикистон бо Ифтихорнома ва Сипосномаҳои Кумитаи кор бо ҷавонон ва варзиш, Раёсати кор бо ҷавонон ва варзиши шаҳри Душанбе ва Академияи миллии илмҳои Тоҷикистон қадршиносӣ гардиданд.

“ҶТ”