Чанде пеш дар шаҳри Душанбе нахустин марафони барноманависӣ ё ҳакатон дар Тоҷикистон бо ташаббуси Клуби соҳибкорони ҷавони назди Кумитаи кор бо ҷавонон ва варзиши кишвар баргузор шуд, ки дар он барноманависони ҷавон ширкат намуда, раҳнамои интернетии хизматрасонии иҷтимоиро тарҳрезӣ ва пешниҳоди ҳакамон намуданд.

Тавре Сулаймон Қурбонон, муовини директори Клуб ба мо иттилоъ дод: “Мақсади чорабинии мазкур беҳтар кардани дастрасии сокинони пойтахт ба манбаҳои иттилооти кушода аст. Яъне, сохтани ягон портал, сомона ва ё барномаи телефонӣ, ки тариқи онҳо мардуми шаҳр осон ба дилхоҳ маълумоти заруриашон дастрасӣ дошта бошанд ва робитаи интерактивӣ ва фиристодани пешниҳодҳояшонро бо хадамотҳои шаҳрӣ таъмин кунанд. Барои омода кардани барномаҳояшон иштирокчиёни гурӯҳҳо 40 соат якҷо фаъолона кор карданд. Дар натиҷа 3 лоиҳаи ҷолиб дар самтҳои “Шаҳрванди фаъол”, “Нақлиёти шаҳр”, “Маълумотномаи шаҳр”, ки ҳамаи онҳо ҳамзамон бо ҳамдигар алоқамандии хуб пайдо карда, ба пойтахти азизамон фоида меоранд, қабули ҳакамон шуд”.

Марафон 10 рӯз идома дошт ва 29 октябр анҷом ёфта, ғолибон ва фаъолтарин ширкаткунандаҳои ин озмун бо ҷоизаҳои пулӣ дар ҳаҷми умумии 20 ҳазор сомонӣ қадрдонӣ шуданд.