Вазорати мудофиаи Тоҷикистон натиҷаи якмоҳаи даъвати баҳории шаҳрвандон ба хизмати ҳарбиро эълон намуд, ки дар ин муддат нақшаи он беш аз 70 фоиз иҷро гардидааст.

Бино ба иттилои манбаъ, бо оғоз гардидани даъвати баҳории шаҳрвандон ба хизмати ҳарбӣ дар нахустин рӯзи даъват, аввалин шуда дар ҷумҳурӣ, шаҳру навоҳии Вилояти Мухтори Кӯҳистони Бадахшон аз иҷрои пурраи нақшаи пешбинишуда баромаданд.

Ноҳияиҳои тобеи марказ аз ҷумла шаҳру ноҳияҳои Рашт, Сангвор, Лахш, Нуробод, Тоҷикобод ва Роғун дар ин муддат дар умум 74 фоизи нақшаи даъвати баҳориро иҷро намудаанд.

Дар ин радиф, дар вилояти Хатлон аз ҷумла ноҳияҳои Вахш, Фархор, Хуросон, Муъминобод, Носири Хусрав, Дӯстӣ, Қубодиён ва шаҳрҳои Нораку Левакант нақшаи иҷро 86 фоизро ташкил медиҳад.

Вилояти Суғд бошад, аз иҷрои 55 фоизи нақшаи даъвату гусели ҷавонписарон ба сафи Қувваҳои Мусаллаҳи ҷумҳурӣ гузориш додааст. Шаҳри Душанбе нақшаро 51 фоиз иҷро кардааст.

Гуфта мешавад, ки дар умум, бо сипарӣ гардидани як моҳ аз ҷараёни даъвати баҳории шаҳрвандон ба хизмати ҳатмии ҳарбӣ, аллакай иҷрои нақша дар кишвар зиёда аз 70 фоизро ташкил медиҳад.