Дар Донишгоҳи Анқараи Ҷумҳурии Туркия вобаста ба бузургдошти Абуабдуллоҳ Рӯдакӣ ҳамоиши илмӣ-адабӣ баргузор гардид.

Дар ин хусус Сафорати Ҷумҳурии Тоҷикистон дар Ҷумҳурии Туркия иттилоъ медиҳад.

Ҳамоиши мазкур бо ташаббуси Сафорати Ҷумҳурии Тоҷикистон дар Ҷумҳурии Туркия ва дар ҳамкорӣ бо сафоратҳои Афғонистон ва Эрон доир гардида, дар он намояндагиҳои дипломатӣ, роҳбарияти донишгоҳ, адабиётшиносону зиёиён аз кишварҳои мазкур дар мавриди манзалату ашъори ин шоири бузург андешаҳояшонро баён доштанд.

Ҳангоми ҷараёни ҳамоиш мусиқии мардумии чор давлати иштирокчӣ иҷро гардид. Ҳамчунин, миёни донишҷӯёни риштаи забони форсии Донишгоҳи Анқара озмуни шеърхонӣ аз ашъори устод Рӯдакӣ доир шуда, дар охир ғолибон ва иштирокчиён бо Ифтихорнома ва туҳфаҳои хотирмон қадрдонӣ шуданд.

Шаҳодат ХОЛОВА "ҶТ"