Дар Кумитаи ҷавонон, варзиш ва сайёҳӣ бо ташаббуси Маҳфили стипендиантҳои ҷавон дар мавзӯи "Ҷалолиддини Балхӣ - нобиғаи адабиёти тоҷик" мизи мудаввар доир гардид.  

Саъдулло Юсуфов, роҳбари Махфили стипендиантҳои ҷавон доир ба саҳми Ҷалолиддини Балхӣ дар адабиёти тоҷик маърӯза карда, гуфт: “Мавлоно Балхӣ аз нобиғагони назми классикии форсу тоҷик буда, дар арсаи суханварӣ ҳамчун Худованди беҳамтои мамлакати ишқу зебоӣ шинохта шудааст. Ӯ инсонро бузургтарин муъҷизаи офариниш мешуморид ва ягонагию иттифоқ ва иттиҳоду ҳамбастагии онҳоро талқин ва тарғиб менамуд. Сулҳу оштӣ, ишқу ошиқӣ, ба ақидаи Мавлоно қодир аст, заминро ба осмон хешу табор гардонад”.

Сипас, Шаҳноза Ҳикматова, Шарифзода Судоба, Диловар Бобоев, Эраҷ Шарифов, Муродбек Неъматуллоев ва Руҳафзо Холмадова атрофи эҷодиёти Ҷ. Балхӣ, нақши осори вай дар замони муосир, дипломатия дар осори Ҷалолиддини Балхӣ ва ғайра маърӯза намуданд.

Мавлоно Ҷалолиддини Балхӣ аз бузургтарин суханварони адабиёти форсу тоҷик ба ҳисоб меравад, ки бо назарияи эъҷозу эҷодаш дар асри 13 такони бузурге ба адабиёт ворид кард. Пас аз Саноиву Аттор Ҷалолиддини Балхиро дар тасаввуф ва ирфон муқаддам медонанд.

Падари Ҷалолиддин аслан зодаи қадимтарин маркази тамаддуни халқи тоҷик - шаҳри Балх мебошад. Ҷалолиддини Балхӣ, қабл аз тааррузи муғул, дар 14-солагӣ ҳамроҳи падар ҳиҷрат намуда, ба Нишопур, Бағдод, Ҳиҷоз, Сурия ва Осиёи Сағир рафт ва дар Куния иқомат ихтиёр кард. Вай аввал бо роҳбарии падари худ Султон Валад дар Куния, сипас, дар Ҳалаб ва Димишк таҳсил намуда, маълумоти нисбат ба он замон мукаммале ба даст овард ва чанд гоҳ ба дарсгӯӣ машғул шуд. Вале дар соли 1224 бо таъсири мулоқоти дарвеши покдил ва орифи ҳақҷӯ Шамси Табрезӣ дарсдиҳӣ ва роҳбарии корҳои тариқати суфияро ба халифагони худ вогузор карда, гӯшанишин гардид.