27 август дар майдони Истиқлоли пойтахт маросими ҷоизасупорӣ ба ғолибони озмунҳои “Беҳтарин ролики сайёҳии шаҳри Душанбе” ва “Беҳтарин акси сайёҳии шаҳри Душанбе” баргузор гардид. Ин чорабинӣ дар доираи сайри рӯзноманигорон ба мавзеҳои сайёҳии пойтахт, ки аз ҷониби шаҳрдории Душанбе роҳандозӣ гардида буд доир шуд.

Ҳамин тавр, мақоми аввалро дар озмуни “Беҳтарин ролики сайёҳии шаҳри Душанбе” аз номинатсияи “Шахсони воқеӣ” Дилбар Наҷмиддинзода, ҷойи дуввумро Саидаҳмад Саидов ва мақоми севвумро Фирдавс Бобоназаров соҳиб шуданд.

Муассисаи давлатии “Телевизиони Душанбе” сазовори ҷойи аввал аз рӯи номинатсияи “Шахсони ҳуқуқӣ”-и озмуни мазкур гардида, ҷойи дуввум ба Ҷамъияти дорои масъулияти маҳдуди “Шоҳтур” ва ҷойи севвум ба Ҷамъияти дорои масъулияти маҳдуди “Сомон трэвел” насиб гашт.

Мақоми аввали озмуни “Беҳтарин акси сайёҳии шаҳри Душанбе”-ро суратгир Дидор Саъдуллоев соҳиб шуд. Суратгирони дигар Шоҳрух Носирзода ҷойи дуввум ва Фаррух Файзуллозода ҷойи севвуми ин озмунро сазовор гаштанд.

Ба ғолибони ҷойи аввали ҳарду озмун 5 000 сомонӣ, ҷойи дуюм – 3 000 сомонӣ ва ҷойи сеюм – 2000 сомонӣ тақдим шуд.

Ёдовар мешавем ки ин озмунҳо се моҳ қабл бо мақсади тарғибу ташвиқи имконоти сайёҳии пойтахт аз сӯи Мақомоти иҷроияи ҳокимияти давлатии шаҳри Душанбе эълон гардида буд.

Роликҳо ва аксҳои пешниҳодшуда бояд рушди имкониятҳои сайёҳии пойтахт ва фарҳангу таърихи миллати тоҷикро инъикос менамуданд.

Сайёраи ҚИЁМИДДИН, “ҶТ”