29 феврали соли ҷорӣ дар Донишгоҳи давлатии тиҷорати Тоҷикистон давраи аввали фестивали ҷумҳуриявии “Ҷилваи ҳусн” баргузор гардид. Дар он Мавсума Муинӣ, муовини аввали раиси Кумитаи ҷавонон, варзиш ва сайёҳии назди ҳукумати кишвар, Мумин Шарипов, ректори ДДТТ ва намояндагон аз Кумитаи кор бо занон ва ва оила ва Вазорати фарҳанг ҳузур доштанд. Тӯли як соат донишҷӯёни донишгоҳ бо нишон додани арзишҳои фарҳанги ниёкон, рақс ва суруд, пероҳани зебои тоҷикона ва арҷ гузоштан ба мероси миллӣ табъи ҳозиринро болида гардониданд.



Меҳмонон ба ҳунари донишҷӯён баҳогузорӣ намуда, омодагии онҳоро ба фестивал, таҷлили он дар сатҳу сифати баланд, мақсаду шеваи ҳунарашон, камбудиҳои ҷойдошта ва дигар ҷабҳаҳои таёрӣ ба ин чорабинии фарҳангиро ёдрас шуданд.



Мавсума Муинӣ аз номи роҳбарияти Кумитаи ҷавонон, варзиш ва сайёҳӣ ба аҳли ташкилкунандагони фестивал изҳори сипос намуда, зикр кард, ки пос доштани арзишҳои миллӣ вазифаи асосии ҳар як шаҳрванди кишвар аст.
Ба гуфтаи номбурда таблиғи либоси миллӣ дар маркази кишвар яке аз роҳҳои асосии ҷалби сайёҳон ба кишвар мебошад. “Хоса вақте сайёҳ моро дар либоси миллӣ мебинад, хотираи гуворое бо худ мебарад. Бинобар ин моро зарур аст ба сару либоси миллиамон диққати ҷиддӣ диҳем, чун он муаррифгари мо ва миллати мост”,- афзуд муовини раиси кумитаи ҷавонон, варзиш ва сайёҳӣ.
Зикр шуд, ки гиромидошти суннатҳои миллии либоспӯшӣ барои он зарур аст, ки ҳам ҳифзи фарҳанги мост ҳам пешгирии тақлидкории бонувон ба либоспӯшии бегона мебошад.