22 сентябр дар пойтахти кишвар - шаҳри Душанбе Фестивали ҷумҳуриявии атласу адрас ва намоишу фурӯши онҳо доир мегардад.

Дар ин хусус Вазорати саноат ва технологияҳои нави Ҷумҳурии Тоҷикистон иттилоъ медиҳад.

Фестивали мазкур бо мақсади тарғибу ташвиқи либоси миллӣ, баланд бардоштани мақому манзалати он, тарбияи зебоипарастӣ, тақвияту густариш бахшидан ба истеҳсолу истифодаи анвои гуногуни либосу матоъҳои миллӣ, рушди атласу адрасбофӣ, рушди соҳаи саноати сабук, рушди меҳнати хонагӣ, тарғиби сарулибос аз матои табиии аз ҷиҳати экологӣ безарар бо истифодаи услубҳои миллии дӯзандагӣ ва бо мақсад зинда намудани ҳунарҳои мардумӣ ва тарғиби он дар байни ҷомеа гузаронида мешавад.

Гуфта мешавад, ки фестивали атласу адрас дар доираи Солҳои рушди саноат (2022-2026) баргузор гардида, ҳамчунин, бо мақсади муаррифии навъҳои гуногуни атласу адраси ватанӣ ва муайян намудани истеъдодҳои нав байни тарроҳони ҷавон ва чирадастони моҳир доир мегардад.

Дар ин фестивал ҳунармандону тарроҳон аз саросари кишвар иштирок варзида, ҳунари худро ба намоиш мегузоранд.

Шаҳодат ХОЛОВА, "ҶТ"