Филми ҳунарии "Дов" дар яке аз ҷашнвораҳои байналмиллалии Олмон иштирок мекунад. Ҷашнвора моҳи ноябр баргузор хоҳад шуд.

Дар ин бора коргардони филм Муҳиддини Музаффар иттилоъ медиҳад.

Гуфта мешавад, ки бахшида ба дусолагии нахустнамоиши филми ҳунарии “Дов” аз 8 то 11 октябр дар кинотолори “Ватан” филми мазкур манзури ҳаводорони синамо хоҳад шуд.

Ёдовар мешавем, ки филми ҳунарии “Дов” бо коргардонии Муҳиддини Музаффар соли 2021 дар шаҳри Конибодом ва Исфара наворбардорӣ шудааст. Нахустнамоиши он дар Душанбе 28 октябри соли 2022 дар кинотолори “Ватан” баргузор гардида буд.

Филми “Дов” дар аввалин синамоҷоизаи миллии “Тоҷи Сомон” ду ҷоиза “Беҳтарин филм” ва “Беҳтарин нақши мардона”-ро сазовор гашт.

То ин дам ин филм соҳиби 22 ҷоизаи кинофестивалҳои байналмилалӣ гардидааст.