Аз 26 то 30 август дар шаҳри Самарқанди Ҷумҳурии Ӯзбекистон Фестивали ХIII байналмилалии мусиқии “Таронаҳои Шарқ” баргузор мегардад

Ба иттилои Вазорати фарҳанги Ҷумҳурии Тоҷикистон дар ин фестивал аз Тоҷикистон ансамбли давлатии “Фалак”-и Кумитаи телевизион ва радиои назди Ҳукумати кишвар, овозхонон Фотима Машрабова ва Шоҳин Абдуллоев, инчунин чор мутриби дигар иштирок менамоянд.

Ҳамзамон дар доираи Фестивали ХIII байналмилалии мусиқии “Таронаҳои Шарқ” конфронси байналмилалии илмӣ-амалӣ низ доир хоҳад шуд. Мавзӯи конфронс “Фарҳанги мусиқии халқҳои Шарқ: асосҳои ҳамоҳангии эҷодӣ дар раванди ҷаҳонишавӣ” буда, дар он мусиқишиносон, олимони марказҳои тадқиқотӣ, ходимони донишкадаҳои олии мусиқӣ, профессорон ва номзадҳои илм ширкат менамоянд.

Фестивали байналмилалии мусиқии “Таронаҳои Шарқ” соли 1997 бо ташаббуси ЮНЕСКО ва Ҳукумати Ҷумҳурии Ӯзбекистон таъсис дода шуда, дар ду сол як маротиба дар Ӯзбекистон баргузор мегардад.

Имсол дар он аз 70 давлати ҷаҳон беш аз 300 нафар ҳунармандон иштирок хоҳанд кард.

Ҳадафи фестивали “Таронаҳои Шарқ” муаррифӣ ва эҳёи мусиқии суннатии халқу миллатҳои гуногун мебошад.

Сайёраи ҚИЁМИДДИН, “ҶТ”