Соли 2022 аз ҷониби мақомоти судӣ барои риоя нагардидани муқаррароти Қонуни Ҷумҳурии Тоҷикистон “Дар бораи забони давлатии Ҷумҳурии Тоҷикистон” тибқи моддаи 89-и Кодекси ҳуқуқвайронкунии кишвар 78 адад парвандаи ҳуқуқвайронкунии маъмурӣ баррасӣ шуда, ба андозаи 68023 сомонӣ ҷарима таъин гардид ва аз ин маблағ 62254 сомонӣ ба фоидаи давлат рӯёнида шудааст.

Ин нуктаро 9 феврал зимни нишасти матбуотӣ Муҳаммадҷонзода Олимҷон Обидҷон, раиси Кумитаи забон ва истилоҳоти назди Ҳукумати Ҷумҳурии Тоҷикистон зикр намуд.

Ба гуфти номбурда маблағҳои мазкур пурра ба буҷаи давлат равона гардидаанд. Аммо мушаххасан гуфта нашуд, ки ин маблағ аз кадом фурушгоҳ ё дигар ташкилоту коргоҳ рӯёнида шудааст.

Раиси Кумитаи мазкур дар посух ба саволи рӯзноманигорон, ки “чаро шиору овезаҳои бо забонҳои ғайр тӯли ин солҳо ба забони тоҷикӣ пурра ба роҳ монда нашудаанд?”, гуфт:

“Мо пайваста дар ин самт корҳои фаҳмондадиҳӣ мегузаронем, аммо як шиору овезаро имрӯз бо забони тоҷикӣ ба роҳ мемонем, фардо боз нафари дигар пайдо мешавад, ки онро бо забони ғайр ба роҳ мемонад”.

Ба назари номбурда ин ҳама аз надоштани ҳувияти миллӣ ва эҳтиром нагузоштан нисбат ба забони модарӣ аз ҷониби баъзе ашхос дар баъзе мавридҳо дидаву дониста сар мезанад.