Ба муносибати таҷлили 25-солагии Истиқлолияти давлатӣ дар ноҳияи Бобоҷон Ғафурови вилояти Суғд Маҷмааи нави фарҳангӣ-фароғатӣ мавриди истифода қарор гирифт.

Он дар масоҳати як гектар бо маблағгузории Мақомоти иҷроияи ҳокимияти давлатии вилояти Суғд бунёд гардидааст. Дар маросими ифтитоҳи маҷмаа муовини раиси вилояти Суғд Заробиддин Файзуллода, раиси ноҳияи Бобоҷон Ғафуров Зариф Назирӣ ва аҳли зиёи ноҳия иштирок карданд.

Зикр шуд, ки бо дастгирӣ ва таваҷҷуҳи ҳамешагии Пешвои миллат, муҳтарам Эмомалӣ Раҳмон соҳаи фарҳанг дар ҷумҳурӣ сол то сол пеш меравад. Бунёди чунин мавзеъҳои зебо дар рушди соҳаи сайёҳӣ дар кишвар низ мусоидат менамояд.
  
Айни ҳол дар ҳудуди ноҳияи Бобоҷон Ғафуров 55 иншооти гуногуни  фарҳангӣ мавҷуд буда, давоми 2 соли охир ҳамаи онҳо аз таъмир бароварда шудаанд.