Саволе, ки дар нишасти хабарии Кумитаи забон ва истилоҳоти назди Ҳукумати кишвар бештар мавриди баҳсу мунозираи масъулин ва рӯзноманигорон қарор гирифт, ин “Чаро номгузории мағозаву фурӯшгоҳҳо бо забони давлатӣ то ҳол ба танзим надаромадааст?” буд.

Муҳаммадҷонзода Олимҷон, раиси кумитаи мазкур дар посух ба он гуфт, ки ба қонунгузорӣ баъзе тағйироту иловаҳоро ворид мекунанд ва ин масъала тазим меёбад.

Доир ба саволи мазкур ҳамчунин ҳуқуқшиноси кумита Ансорӣ Шодмон афзуд, ки дар воқеъ дар самти номгӯзорӣ ва эълону реклама то ба ҳол мушкилот ва бесарусомонӣ вуҷуд дорад.

- Масъалаи эълону реклама тибқи моддаи 13-и Қонуни Ҷумҳурии Тоҷикистон “Дар бораи забони давлатии Ҷумҳурии Тоҷикистон” ба дигар забонҳо низ иҷозат дода шудааст, аммо дар мавриди номгузорӣ бошад, тибқи моддаи 18-и қонуни мазкур номгузориҳо танҳо бояд бо забони давлатӣ бошад,-гуфт дар идома ҳуқуқшиноси кумита.

- Вақте санҷиш мегузаронем, ба чунин нафарон мо корҳои фаҳмондадиҳӣ мегузаронем. Ҳамеша таъкид менамоем, ки ин гуна номгузорӣ ғалат аст ва онҳо дарҳол иштибоҳҳои хешро ислоҳ мекунанд. Вақте ки онҳо камбудиҳоро бартараф мекунанд, ҷарима бастанро нисбати чунин нафарон муҳим намешуморам, - афзуд Муҳаммадҷонзода Олимҷон.