Дар доираи баргузории Конфронси байналмилалии илмӣ-назариявӣ бахшида ба бузургдошти Мавлоно Ҷалолуддини Балхӣ, дар қароргоҳи ЮНЕСКО-и Париж таҳти унвони “Инъикоси осори Мавлоно Ҷалолуддини Балхӣ” аз ҷониби Ҷумҳурии Тоҷикистон намоиши ҷашнӣ гузаронида шуд.

Дар ин бора аз Вазорати фарҳанги Ҷумҳурии Тоҷикистон хабар доданд.

Дар намоиш осори илмию адабии Мавлоно, нусхаҳои дастнавис ва чопи сангии асарҳои Мавлоно аз ҷумла “Маснавии маънавӣ”, ки аҳамияти бузурги таърихию фарҳангӣ доранд, пешниҳоди тамошобинон гардонида шуданд.

Инчунин, дар намоиш нусхаҳои дастнавис ва якчанд асари санъати миниётурнигорӣ, ки аз ҷониби рассом-миниётурнигор Олимҷон Комилзода тасвир гардидаанд, ба намоиш гузошта шуд. Дар ин асарҳо достонҳо аз осори Мавлоно бо санъати миниётурӣ офарида шудаанд.

Ҳамзамон аксҳо аз маросими ифтитоҳи мақбараи рамзӣ ва хона-музейи Мавлоно дар ноҳияи Ҷалолидини Балхӣ, ки аз ҷониби Президенти Ҷумҳурии Тоҷикистон муҳтарам Эмомалӣ Раҳмон ифтитоҳ гардида буд, ба намоиш гузошта шуд.

Наҷиба МУРОДБЕКОВА, “ҶТ”