Аз 1 то 3 октябр шаҳри Истаравшани вилояти Суғд аввалин Фестивали байналмилалии ҳунармандӣ доир мешавад. Қарор аст дар он 20 узви Раёсати Шурои ҷаҳонии ҳунармандӣ, 40 ҳунарманд аз давлатҳои аъзои Шуро, 80 ҳунарманд аз шаҳри Истаравшан ва дигар шаҳру ноҳияҳои Ҷумҳурии Тоҷикистон иштирок кунанд.

Дар доираи Фестивал намоиши маҳсули дасти ҳунармандони давлатҳои аъзои Шурои умумиҷаҳонии ҳунармандӣ, ҳунармандони шаҳри Истаравшан ва дигар шаҳру ноҳияҳои мамлакат дар назар аст.

Ҳамчунин ба шаҳри Истаравшан ҳамчун “Шаҳри ҷаҳонии ҳунармандӣ” шаҳодатнома тақдим хоҳад шуд.

Тавре хадамоти матбуоти раиси вилояти Суғд хабар медиҳад, зимни баргузории нахустин ҷаласаи Кумитаи тадорукот рамзи нахустин фестивали ҳунармандӣ “Озар” тасдиқ шудааст.

Гуфта мешавад, ки ин рамз аз ситораи равшани ҳашткунҷа, ки ифодагари маънои Истаравшан мебошад, иборат аст. Инчунин дар он расми “Қалъаи Муғ” ва корд ҷой дода шудааст.

Зикр мегардад, ки “Озар” ном гирифтани ин фестивал ба Озари силоҳсози Истаравшанӣ марбут аст. Имрўз низ ҳанармандони ин шаҳр ҳамчун оҳангару кордсоз ва ханҷарсозу шамшергар идомабахши ҳунарҳои аҷдодони худ мебошанд.