- Иди Наврӯз бо сайю талош ва азми қавии Роҳбарияти Олии мамлакат ҷаҳонӣ шуда, шӯҳрати умумиҷаҳонӣ пайдо намуд, - гуфт Утакамбек Темурбеков, директори Коллеҷи тиббии Хоруғ зимни баромади хеш дар чорабинии идона бахшида ба ҷашни Наврӯз.

- Маҳз ташаббуси нопайдоканори Пешвои миллат, муҳтарам Эмомалӣ Раҳмон буд, ки ин мероси арзишманди аҷдодӣ аз ҷониби ҷаҳониён пазируфта шуду феълан аҳамияти байналмилалӣ дорад, - афзуд У. Темурбеков.

Муовини директори Муассисаи давлатии "Маркази ҷавонони ВМКБ" Дидоршоҳ Насридинов иброз дошт, ки: "Чунин арзишҳои воло амсоли Наврӯз, Меҳргону Сада бо як назокат, расму русум аз ниёгонамон боқӣ мондаанд ва қарзу фарзи ҳамаи мо он ҳаст, то баҳри нигаҳдории онҳову ба наслҳои минбаъда фаҳмондани муҳимияти идҳои аҷдодӣ талошҳои бештар кунем”.

Директори Коллеҷи тиббӣ ба чанд нафар аз муҳассилини фаъоли ин омӯзишгоҳ мукофоти хотиравӣ тақдим намуд ва баъдан донишҷӯён барномаи рангини фарҳангии омодашудаи хешро пешкаши ҳозирин гардонданд.

Бояд қайд кард, ки чорабинии идона бо ибтикори муассисаву коллеҷи доир гардида, дар он ҳамчунин беҳтарин молу маҳсулот, намунаи ҳунарҳои дастӣ ба маърази тамошо гузошта шуд.