Радио воситаи иттилоърасон. Маънибахши ҳамагон. Рӯҳиябахшу фароғатдиҳандаи шунавандагон. Пайвандгари одамон. Ҳамсафари ҳамеша ҳамроҳ. Ҳам дар роҳу ҳам дар манзилу ҳам дар коргоҳ.

Барои пайгирии барномаҳои он моро зарур нест пайдо намудани як макон. Танҳо кофист онро фаъол кард дар мошин, хона, телевизион ё телефон. Ҳарчанд замонаро имконот гашт фаровон, аммо радиоро монд ҳанӯз ҳамон мақом.

Мо низ соҳибрадиоем. Ҳанӯз аз 10 апрели соли 1930. Радиои мо 92 сол аст садо дорад. Барномаҳои шуниданӣ дорад. Шунавандаи сершумор дорад. Пурсози фазои иттилоотии кишвар аст. Ин аст, ки намудаем як рӯзи тақвимро эҳдояш. Гуфтаем санаи таъсисашро рӯзи Радиои Тоҷикистон бо умеди ҷовидон мондани он.
Ин сана моро низ сайр кунонд дар олами Радиои Тоҷикистон.

МАКОНИ ҶАВОНИИ РАДИОИ ТОҶИКИСТОН

Бинои пур аз рӯзноманигорон, радиодӯстдорон, гӯяндагон, хушсадоён, таҳлилгарон, сарояндагону навозандагон. Кумитаи телевизион ва радиои назди Ҳукумати Ҷумҳурии Тоҷикистон. Шабакаҳои радиоии давлатии моро ҳамин биност макон.

Мо рафтем ошёнаи шашум. Гӯшаи ибрози ҳарфҳои ҷавонон. Гӯяндаи ҷасорату матонату ормонҳои варзишгарон. Ҷалбкунандаи сайёҳон ба ҳар канори хушманзари ватанамон. Ин ҷост Идораи ҷавонӣ, варзиш ва сайёҳии Радиои Тоҷикистон.

Ҳама банди кор. Яке менигошт нақшаи барномаеро. Яке машғули суҳбат буд бо қаҳрамони худ. Яке танзим менамуд. Яке кор мекард болои лоиҳаи ҷадиде. Яке сабт мекард гузорише. Яке рафта буд пайи баррасии мавзӯе.

Ҳар назар санҷида мешуд аз ҷониби сармуҳаррир. Рӯи ҳар барнома хам мекард сари таҳрир. Ҳар суоли онҳо соҳиби посух мешуд аз сӯи ӯ. Ҳар нақша роҳнамоӣ мегардиду ҳар иқдом роҳандозӣ. Робита басо устувору ҳамбастагӣ пойдор буд дар ин идора.

Идораи ҷавонӣ, варзиш ва сайёҳии Радиои Тоҷикистон таъсис ёфта соли 2015. Дар заминаи идораи фарҳангӣ-фароғатӣ. Шумори барномаҳои таҳияшуда дар ин ҷо беадад аст то ин замон. Мақомаш волост дар радиои Тоҷикистон.

ИМРӮЗИ ИДОРА

“Татбиқи сиёсати давлатии ҷавонон, рушди варзиш ва муаррифии имкониятҳои сайёҳии кишвар самти асосии фаъолияти Идораи ҷавонӣ, варзиш ва сайёҳии Радиои Тоҷикистон мебошад”, - мегӯяд Дилшод Алсамадов, сармуҳаррири идора.

Ин аст, ки барномаҳои идора равона гардида ба ҳамин самт. Яке меравад сӯи дунёи пуршӯри ҷавонӣ. Яке пайи муаррифии таҳамтане аз олами паҳлавонӣ. Дигаре сайркунандаи минтақаҳои сайёҳӣ.

Бино ба зикри сармуҳаррири идора, ҳар муҳаррир ҳар сол нақшаи барномаҳои худро тарҳрезӣ менамояд. Бо қабул шудан, омода ва пешниҳоди шунавандагон мегарданд. Албатта, бо шакл ва муҳтавои гуногун.

Соли равон низ муҳаррирони идора серталошанд. Барномаҳои зиёд омода шудаю лоиҳаҳои ҷадид рӯи коранд.

“Дар Идораи барномаҳои ҷавонӣ, варзиш ва сайёҳии Радиои Тоҷикистон бо мақсади беҳ сохтани мазмуну муҳтавои барномаҳо ва ҷалби ҳарчи бештари шунавандаҳо лоиҳаи барномаҳои нави мустақим ва сабтӣ рӯи кор омаданд”,- зикр медорад Дилшод Алсамадов.

Имрӯз идораро зиннат мебахшад бо муаррифии ҳунарварони касбӣ “Анвори ҳунар”. Бошаҳоматаш месозад “Шӯкуҳи истиқлол”. Рӯшанаш месозад бо дониш “Ҷилои хирад”. Аз низом мегӯяду соҳибмасъулиятӣ “Низоми масъулият”. Таъкид медорад боло бурдани сатҳи донишро “Маърифат”
.
“Анвори ҳунар”-ро мақсад татбиқи ҳадафҳои Ҳукумати Ҷумҳурии Тоҷикистон дар самти рушди ҳунарҳои мардумӣ ва арзишҳои таърихию фарҳангии миллати тоҷик аст.
“Шукӯҳи истиқлол” мегӯяд аз дастовардҳои замони соҳибистиқлолии кишвар.

Чеҳракушоии ғолибони озмунҳои “Фурӯғи субҳи доноӣ китоб аст” ва “Тоҷикистон - Ватани азизи ман” таҷассум меёбад дар барномаи “Ҷилои хирад”.
Ҳамин гуна, ҳар барномаро мақсаду ҳадаф, жанру шакл ва муддату давомнокӣ муайян аст.
Идораро бе пайгирӣ намудани мавзӯъҳои вобаста ба ҳаёти ҷавонон наметавон тасаввур кард. Муҳаррири идора Наҳтутӣ Алиева ҷавононро мепайвандад бо ҷомеа дар барномаи "Ҷавонон ва ҷомеа”.

“Лаҳзаҳои варзиш” болои варзишгарон ва ҳолатҳои ҷолиби мусобиқоти онҳо таваҷҷуҳ мекунад.
Шумори барномаҳои идораро бо ин адад наметавон ҷамъбаст кард. Зеро боз чандин барномаҳои дигар низ омодаю пешниҳод мегарданд ба шунаванда. Аз қабили “Илм ва ҳаёт”, “Майдони сабз”, “Танаффус”, “Хуррамдиёр”, “Фасоҳати калом”, “Насли сомон” ва ғайра.

Идора аз фароғатбахшӣ ҳатман орӣ нест. Ҳар шоми ҳаммеҳанонро “Шом ба хайр” ба хайр мегӯяд. Барнома мустақим ҷараён гирифта, пайдокунандаи иртиботи қавӣ бо сомеон аст.
Сармуҳаррири идора - Дилшод Алсамадов пайвастан бо сомонаҳои иҷтимоиро дар ин замон зарур мешуморад. Ин аст, ки соли гузашта бо ташаббуси ӯ саҳифаи расмии идора дар сомонаи иҷтимоии Фейсбук зери унвони “Идораи ҷавонӣ, варзиш ва сайёҳии Радиои Тоҷикистон” рӯи кор омад. Муҳтавои барномаҳо он ҷо инъикос мегарданду шумори аъзояш ҳамарӯза меафзояд.

АЗ “СИРИШТ”-И ҲУНАРМАНДОН ТО “НЕРУ”-И ВАРЗИШГАРОН

Лутфулло Азизов қаблан рӯи лоиҳаҳои телевизионӣ кор мекард. Аммо ҳоло корманди радиою Идораи ҷавонӣ, варзиш ва сайёҳӣ аст. Ҳоло масъулияташ афзудааст. Чун масъулияти муовини сармуҳаррирро ба дӯш дорад. Фаъолиятро дар ин идора хуб арзёбӣ мекунаду ҷонибдорӣ аз сиёсати пешгирифтаи Ҳукумати кишварро рисолати худ мешуморад.
Ӯ гӯяндаи “Сиришт”-и чеҳраҳои муваффақу мондагор аст. Новобаста аз самту соҳа. Шунавандаро 45 дақиқа ошно месозад бо тинату ниҳоди онҳо. Мехоҳад, ба насли наврасу ҷавон бо ин роҳ идеал бубахшад.

“Неру” лоиҳаи ҷадид аст, ки аз ҷониби муҳаррири идора Сорбон Амонуллозода пешниҳод гардидааст. Бо “Неру” аз тавону ҷуръату ҷасорати варзишгарон хоҳад гуфт. Ӯ ҳамагӣ чанд моҳ аст, ки ба сифати корманд пазируфта шуда дар ин идора. Аммо ҳадафаш устувору талошаш саршор аст.

Дар ҷараёни баргузории Чемпионати Осиё оид ба велосипедронӣ яке аз гузоришгарони фаъол маҳсуб ёфт.
“Идораи мо кӯшиш мекунад, рӯзноманигорони соҳавӣ омода намояд. Аз ин рӯ, ҳар муҳаррир бевосита равона мегардад ба самте, ки хоҳиши ӯст”,- мегӯяд ӯ.
Ҷамила Ҷамолова аз он муҳарриронест, ки аз оғози таъсис идораро ҳамроҳӣ мекунад. Имрӯз пешбарандаи барномаи мустақими “Маърифат” аст. Бо он таҳлил мекунад барномаҳои соҳаи маорифро. Боло бурдан мехоҳад сатҳи дониш, биниш ва ҷаҳонбинии наврасону ҷавононро. Фаъолияти кунунии идораро бо сармуҳарририи Дилшод Алсамадов хуб мегӯяду ҳадафҳоро созанда.

“Радиосаёҳат” бо шунавандагон сайр мекунад ба ҳар гӯшаи ватан. Масъули он Зулайхо Расулова. Ӯ аз аввали фаъолият дар радио омада ба ин идора ва интихоб намуда самти сайёҳиро. Ифтихор дорад, ки дар идораи ҷавонисту яке аз ҷавонони пурталош.

ФАРДОИ ИДОРА

Дилшод Алсамадов барои оянда тасмимҳою ҳадафҳои идораро бешумор мехонад. Тасмимҳои тозаю лоиҳаҳои ҷадид зиёданд. Ҳамчунин, идора барои ҷалби ҷавонони бомаҳорати ин соҳа низ талошманд аст.

Мо низ баргаштем бо умед бастан ба он, ки Идораи ҷавонӣ, варзиш ва сайёҳии Радиои Тоҷикистон бошад макони пуршӯр, пурғайрат, пурният. Монад ҳамеша ҷавон. Бигардад фардояш боз дурахшон. Ифтихор бошад ба Радиои Тоҷикистон.