Ба муносибати Рӯзи Рӯдакӣ, ки ҳамасола 22 сентябр таҷлил мешавад, дар китобхонаи марказии шаҳри Норак бо иштироки васеи толибилмони муҳасилини шаҳр чорабинии бошукӯҳ таҳти унвонии «Рӯдакӣ чанг бигрифту навохт…» баргузор гардид.

Чорабиниро муовини раиси шаҳр Ҳасанзода Шаҳло Ҳасан ифтитоҳ намуда, мавсуф роҷеъ ба рӯзгору осори Абӯабдуллоҳи Рӯдакӣ, замони аҳди Сомониён, суханварони ҳамасри устод Рӯдакӣ андешаҳои ҷолиб баён кард. Таъкид гардид, ки маҳз бо шарофати замони соҳибистиқлолӣ шеъри ноби тоҷикии Одамушшуаро Абӯабдуллоҳи Рӯдакӣ дар сатҳи баланд арҷгузорӣ мешавад.

Дар рафти чорабинӣ доир ба ҳаёти шоир филми мустанади «Дарёи панди Рӯдакӣ» пешкаши тамошобинон гардид. Дар фароварди маҳфили шеъру шоирӣ барои ҳозирин санъаткорони шаҳр барномаи фарҳангӣ пешкаш намуданд.

Дар фарҷоми чорабини аз тарафи бахши кор бо ҷавонон ва варзиши шаҳр ба 10 нафар хонандагони болаёқат ифтихорнома супорида шуд.

Умед МИРЗОЕВ, “ҶТ”