Дирӯз, 4 сентябр, ба муносибати 10-солагии таъсиёбии Муассисаи давлатии “Телевизиони кӯдакону наврасон “Баҳористон” чорабинии идона баргузор гардид. Дар он роҳбарияти Кумитаи ҷавонон, варзиш ва сайёҳӣ, Кумитаи телевизион ва радио, Иттифоқи журналистон, Иттифоқи нависандагон иштирок намуданд.

Дилафрӯз Амирзода, директори МД «Телевизиони Баҳористон» иброз намуд, ки соли 2006 бо ташаббус ва дастгирии бевоситаи Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон муассисаи мазкур таъсис ёфт.

Муовини якуми раиси Кумитаи ҷавонон, варзиш ва сайёҳӣ Мавсума Муинӣ барои ҳамкориҳои судманд дар татбиқи босамари сиёсати давлатии ҷавонон, варзиш ва сайёҳӣ ба роҳбарият ва кормандони телевизиони «Баҳористон» изҳори сипос намуда, барои саҳми муносибашон дар рушду инкишофи соҳа “Ифтихорнома” ва “Сипоснома” такдим намуд.

Зинатулло Исмоилзода, раиси Иттифоқи журналистони Тоҷикистон, Низом Қосим, раиси Иттифоқи нависандагони Тоҷикистон, Набӣ Набизод, директори Муассисаи давлатии «Телевизиони Синамо», Озар Баҳромзода, намояндаи Вазорати фарҳанг суханронӣ намуда, ба як қатор кормандони фаъоли телевизиони «Баҳористон» унвонҳои «Аълочии матбуоти Тоҷикистон», «Аълочии телевизон ва радио» ва «Аълочии фарҳанги Тоҷикистон» тақдим намуданд.