Имрӯз, 20-уми июн, дар Маркази ҷумҳуриявии фарҳангии ҷавонон “Ориёно” бахшида ба 19-солагии Рӯзи Ваҳдати миллӣ бо ташаббуси Кумитаи ҷавонон, варзиш ва сайёҳӣ таҳти унвони “Нақши Пешвои миллат дар таҳкими Ваҳдати миллӣ” маҳфили адабӣ-фарҳангӣ баргузор гардид.  

Аҳтам Абдуллозода, раиси Кумитаи ҷавонон, варзиш ва сайёҳӣ, ҳозиринро ба муносибати ҷашни Ваҳдати миллӣ шодбош гуфта, қайд кард, ки “Ваҳдати миллӣ ҳамчун рамзи пирӯзиву хушбахтӣ ба мардуми тоҷик неруву тавоноӣ бахшида, дар қалби ҳар тоҷику тоҷикистонӣ шуълаи умедро ба фардои ободу осуда фурӯзон намуд. Воқеан ҳам, миллати тоҷик созандаву бунёдкор, соҳибтамаддуну сулҳхоҳ ва таҳаммулгаро буда, дар навбати худ метавонанд, бо ваҳдату сарҷамъӣ ҷомеаи муосири демократӣ, ҳуқуқбунёд ва дунявӣ бунёд намоянд. Мазмуну моҳият ва арзиши ваҳдати миллӣ дар қалбҳои пиру барнои кишвар мақому манзалати бештар касб кардааст. Зеро маҳз ваҳдати миллӣ халқи тоҷикро аз хатари парокандагӣ ва вартаи нобудӣ раҳо бахшида, заминаи мусоидеро фароҳам овард, ки мо муттаҳиду иттифоқ бошем”.



Зикр шуд, ки Асосгузори сулҳу Ваҳдати миллӣ, Пешвои миллат, Президенти ҷумҳурӣ, муҳтарам Эмомалӣ Раҳмон бо дилу нияти нек зимоми идораи давлатро дар замони бениҳоят ҳассос, ки хавфи пароканда шудани давлат ва аз байн рафтани миллати тоҷик баръало эҳсос мегардид, бар уҳда гирифтанд ва дар як муддати кӯтоҳ шуълаи умедро ба фардои дурахшон дар қалби ҳар як фарди миллат фурӯзон намуданд. Ин буд, ки меҳнаткашон, модарону хоҳарони мушфиқ, пирони рӯзгордидаву ҷавонони навовару ғайратманд, чашми ростбин, гӯши ҳақшунав, ақли бедору хиради дурбин, забони ҳақгӯву табъи нуктасанҷ ва ҳазорҳо бозуи қавӣ дар зери сиёсати оқилонаашон гирд омада, дар ободиву пешравии Тоҷикистон муттаҳид гардиданд.

Раиси Кумитаи забон ва истилоҳоти назди ҳукумати ҷумҳурӣ Гавҳар Шарофзода вобаста ба нақши ваҳдат ва таърихи он суханронӣ намуда, қайд намуд, ки “ҷашни Ваҳдати миллӣ яке аз бузургтарин ҷашнҳо мебошад. Зеро дар олам миллатҳое ҳастанд, ки орзу мекунанд, то ваҳдат дошта бошанд. Миллатҳое ҳастанд, ки хеле парешонанду на забони ягонаву на ватан доранд. Тоҷикистони азизи мо дар ин баҳри беканор киштии бисёр зебову мусаффоеро мемонад, ки ваҳдату истиқлолият ва озодӣ дорад. Имрӯз бояд шукргузор бошем. Бо боварӣ гуфта метавонам, ки ояндаи ин марзу бум ва миллат дар дасти ҷавонон аст. Кӯшиш кунед, он амонате, ки аз модар барои мо омадааст ва Президенти маҳбуби мо онро олитарин муқаддасот эълон доштааст, арҷ бигузоред ва ҳама вақт дар Рӯзи Ваҳдати миллӣ аз ҳафт то ҳафтодсолаи тоҷикистонӣ бояд тӯю сур дошта бошад. Чунки ин лаҳзаҳо ба ҳама миллатҳо муяссар нагаштааст”. 



- Вақте ки мо дар мавзӯи нақши Пешвои миллат дар таҳкими Ваҳдати миллӣ суҳбат мекунем, албатта ба ҳеҷ ваҷҳ набояд фаромуш кард, ки ин нақш ва ин саҳм ки аз ҷониби Асосгузори сулҳу ваҳдати миллӣ то имрӯз мавриди амал қарор мегирад, ҳануз аз моҳи декабри соли 2015, баъд аз қабул шудани қонун дар бораи “Асосгузори сулҳу ваҳдати миллӣ - Пешвои миллат” шуруъ нашудааст. Ин саҳм ҳануз аз баргузории Иҷлосияи 16-уми Шӯрои Олӣ дар шаҳри бостонии Хуҷанд моҳи ноябри соли 1992 оғоз гардида буд. Инак 24 сол аст, ки Пешвои миллат бо кӯшиш ва саҳми пайгиронаи худ дар татбиқи Ваҳдати миллӣ саҳми бузург мегузоранд, - иброз дошт зимни суханронии худ Илҳомҷон Ҳамидов, узви Шӯрои марказии кумитаи иҷроияи ҳаракати ҷамъиятии “Ваҳдати миллӣ ва эҳёи Тоҷикистон”.

Гуфта шуд, ки Ваҳдати миллӣ барои мардуми мо бояд ҳамеша муқаддас ва гиромӣ бошад, онро дар радифи тамоми дастовардҳои миллӣ барои фардои дурахшони сарзамин ва амнияти халқамон ҳифз намоему пос дорем.
 
Дар чорабинӣ ба ғолибони озмуни ҷумҳуриявии мақолаи беҳтарин дар мавзуи “Диёри ваҳдатофаринам, Тоҷикистон”, ки ҷойи аввалро Бибӣ Келдиева, ҷойи дуюмро Ваҳдат Дайхудоев, Азиза Ҳайдарова ва ҷойи сеюмро Самандари Раҷабалӣ ва Каримҷон Салимов ишғол намуданд, “Сипоснома” ва тӯҳфаҳои хотиравии Кумитаи ҷавонон, варзиш ва сайёҳӣ тақдим шуд. Инчунин ғолибони озмуни мусаввирони ҷавон, таҳти унвони "Тоҷикистон - кишвари ман!" бо сипосномаю тӯҳфаҳои хотиравӣ сарфароз гардонида шуданд.
Дар охир барномаи фарҳангӣ пешкаши ҳозирин гардонида шуд.