Лимит ё маҳдудияти барқ аз мушкилотест, ки пайваста сокинони кишварро нигарон мекунад. Маҳдудияти барқ аксаран дар фаслҳои тирамоҳ ва зимистон бештар ҷорӣ мегардад – замоне, ки сокинон ба он ниёзи бештар доранд.

Рӯзноманигорон имрӯз - 13 феврал дар нишасти хабарии ҶСХК “Барқи тоҷик” аз масъулини ин ширкат суол карданд, ки дар Тоҷикистон маҳдудияти барқ кай аз сар гирифта мешавад ва сабаби асосии ин маҳдудиятҳо чист?

Маҳмадумар Асозода, раиси ҶСХК “Барқи тоҷик” сабаби ҷорӣ гаштани маҳдудияти барқро дар зиёд шудани истифодабарандагони он ва кам шудани резиши об дар фаслҳои тирамоҳ ва зимистон маъниндод кард. Ӯ гуфт, ки айни ҳол наметавонанд замони муайяни бекор кардани маҳудиятҳоро гӯянд.

- Маҳдудиятҳо замоне бардошта мешаванд, ки ҳаҷми истеҳсол ба ҳаҷми истифодабарӣ баробар гардад, - гуфт М. Асозода.

Иттилоъ дода шуд, ки соли 2023 дар кишвар бо дарназардошти НБО-ҳои хурду бузарг 21 млрд. 656 млн. кВт. соат неруи барқ истеҳсол шудааст, ки нисбат ба ҳамин давраи соли 2022 453 млн. кВт. ё 2,2 фоиз зиёд мебошад. Аммо дар ҳамин ҳол раиси ҶСХК “Барқи тоҷик” нагуфт, ки ҳаҷми истифодабарии барқ дар кишвар чӣ миқдор аст.

Ҳошим РАҲМАТУЛЛОЕВ, “ҶТ”