КИТОБХОНА
Ҷумъа 16 Апрел 2021 07:04
7722
Фурқати Низом, яке аз дилбохтагони роҳи шеър 4 июли соли 1994 дар деҳаи Нилуи шаҳри Ҳисор ба дунё омадааст. Соли 2012 мактаби миёнаи №50-и зодгоҳашро хатм намуда, ба факултети филологияи тоҷики ДМТ дохил мешавад. Баъди хатми донишгоҳ шурӯъ мекунад ба рӯзноманигорӣ. Айни ҳол корманди телевизиони “Сафина” аст.

Аз шеъраш бармеояд, ки Фурқат дар ин ҷода тасодуфӣ набуда, хоҳиши дар баҳри сухан шино кардан дорад, агарчӣ ӯро душвориҳое пайи ҳам дар пеш аст.

Лекин дониста монад, ё шояд медонад;

Мард бояд, ки ҳаросон нашавад,
Мушкиле нест, ки осон нашавад.

Бале, аз суҳбатҳои телевизионияш ҳис мекунем, пурталошӣ ва қавииродагияшро. Аз сабку услубаш аниқ аст, ки аз гузаштаҳо баҳра бурда, мехоҳад шеъри имрӯзро сарояд. Барои мисол чӣ мехоҳад:

Дубора мерасам ба нур,
Дубора мешавад сурур.
Ба рӯзи вопасини ғам,
Баҳор мерасад зи дур.

Ё дар шеъри “Борон” аз хоҳиши дилаш дидан кунед:

Тамоми хотира аз резиши навои ту буд,
Ман аз суруди пур аз меҳру ошиқонаи ту
Ба ишқ пайвастам!

Боқӣ, хонандаи азиз худ шеърҳояшро хондаву қазоват кунед.

Баъд аз сукути ҷилваи хуршеди безаваол,
Борон чу бар навозиши рӯи ту дар расид.
Бо донаҳои нарм,
Бо як навои дилкашу бо бӯсаҳои гарм
Чун лола ҷисми нозуки ворастаи туро
Оғӯши худ кашид.
Аммо ба зери чатри ҳасодат мани фигор
Бо қалби беқарор,
Бо рашки бешумор
Ҳамсӯгвори нолаи борон нишастаам.


Пас аз бидруд дар ин ҷо...
Ҳисорам ғуссабунёд аст.
Хурӯҷи зулмати андешаи шаб,
Ба рағми дидаи бедор озод аст.
Садои андалебони чаман
Аз ваҳшати буғзи саҳар дар хеш меларзанд.
Биё, бе ту,
Биё, бе ту,
тамоми шаҳр фарёд аст....


Ман самоям
Дар замин,
Дар зери по,
Абрҳои пораи ман ғарқи чангу ғарқи коҳ.
Ман наборам барфу борон бар замин,
Балки резад бар сарам бори гуноҳ.
Офтоб аз ман бигардонида рӯ,
Моҳтоб аз шарри ман ҷӯяд паноҳ.
Рӯшноӣ рафта аз дунёи ман,
Тирагӣ бинмуда ҳоламро табоҳ.
Ман самоям
Дар замин,
Дар зери чоҳ...


Паси ин равзанаи ашколуд
Хонаи сарду хомӯш
Ва мани ғуссабадӯш
Бо ҳама ҷӯшу хурӯш
Чашму абрӯву нигоҳу нафаси гарми туро меҷӯям...


Раҳоям кун,
Бирав, дигар макун васвосу бадроҳам,
Ки аз бисёр буданҳои ту лабрези дарду ғуссаву оҳам
Ва гумроҳам
Ту, эй шайтони навмедӣ!


Ба рағми ғуссаҳои дил
Навои шод мезанам,
Ниҳоли дарду ҳасратат
Зи боғи сина меканам!
Дубора мерасам ба нур,
Дубора мешавад сурур.
Ба рӯзи вопасини ғам,
Баҳор мерасад зи дур.


Дубора лаҳзаи дидору васли иҷборӣ,
Дубора банди ҳасодат, нигоҳи безорӣ.
Дубора рафтани хуршеду ҷилваҳои қамар,
Шабони тору дурӯғину чашми бедорӣ,
Саломи сарду нигоҳе пур аз виқору ҳазин,
Каломи пур зи такаллуф ба вақти беморӣ.
Дубора рафтану боз омадан ба хонаву кор,
Дилам гирифта аз ин ҷодаҳои такрорӣ...


БОРОН

Тамоми хотира аз резиши навои ту буд,
Ман аз суруди пур аз меҳру ошиқонаи ту
Ба ишқ пайвастам!
Ва қалби бехабар аз дарди бедавои туро
Ба ҳалқаи ҳаваси ишқи бевафо бастам.
Ҳамон, ки духти ту буд,
Ҳамон ки дар ҳарами ишқ бо ман ошноӣ дошт,
Ҳамон, ки рози муҳаббат барои ман бикшод.
Вале бирафт!...
Дигар зи замзамаву ҳарфи ту гурезонам.
Ҳар он чи хотира аст
Даруни оташи ғамҳои худ бисӯзонам...

Эзоҳи худро нависед



Рамзҳо дар расм

Рӯзнома

Назарсанҷӣ

У вас нет прав на участие в данном опросе.

Тақвим

Дш Сш Чш Пш Ҷ Ш Яш
29 30 31 1 2 3 4
5 6 7 8 9 10 11
12 13 14 15 16 17 18
19 20 21 22 23 24 25
26 27 28 29 30 1 2

Апрел 2021 c.