Бахшида ба 60-солагии доктори илмҳои филологӣ, профессор Мурод Муродӣ китобе таҳти унвони “Шаст баҳори умр” нашр ва пешниҳоди хонанда гардид.

Мураттиби китоб Қироншоҳ Шарифзода буда, он дар чопхонаи ҶДММ “Аржанг” бо теъдоди 100 нусха рӯйи чоп омадааст ва 272 саҳифаро дар бар мегирад.

Маҷмуа аз лавҳаю очерк, мақолаву мусоҳибаҳои ҳамкасбону ҳампешагон ва шогирдони профессор Мурод Муродӣ фароҳам омадааст, ки ба ифтихори шастумин баҳори умри устод иншо шудааст.

Муаллифони нигоштаҳо паҳлуҳои гуногуни рӯзгору корзори қаҳрамони худро аз равзанаи фаҳму идроки хеш ба қалам дода, талош кардаанд, корномаву зиндагиномаи воқеии ҳамкасбу ҳампеша, устоду ҳамнишини худро тасвир намуда бошанд.
Дар пешгуфтори китоби мазкур дар бораи устод М. Муродӣ омадааст: “Омӯзгори донишгоҳ ба фарқ аз ҳамкасбони хеш дар муассисаҳои таҳсилоти миёна, миёнаи махсус, ҳунаргоҳҳо, баробари таълиму тарбияи тахассусии шогирдон, омода намудани онҳо ба касбу пешаи оянда, ба таҳқиқу пажӯҳиши мавзуву масъалаҳои мубрами самти таълим низ машғул аст. Дуруст аст ё не, ин паҳлуи фаъолияти омӯзгори муассисаи таҳсилоти олӣ баъзан аз ҳунари дарсдиҳиву касбомӯзӣ ба шогирдон, муҳимтар арзёбӣ мегардад. Дар нигоштаҳои ҳамкасбон ин масъала вобаста ба фаъолиятҳои илмию таҳқиқотии профессор Муродӣ, ки самараш даҳҳо монографияву китобу воситаҳои таълим, дустурҳои методӣ мебошад, бо ҷиддияту ҳамраъйӣ инъикос ёфтааст”.

Дар маҷмуа 35 нигошта дар се қисмат зери унвонҳои “Арзёбии ҳамкасбон”, “Эътирофу эҳтироми ҳампешагон” ва “Арзи таманнои шогирдон” ҷойгир шудаанд, ки хонданибобу бозгукунандаи фаъолияти босамари М. Муродӣ мебошанд.

Малика МУҚАДАМОВА, “ҶТ”