Аз саҳар авзои Шоҳин вайрон буд. Вақте ки модараш ӯро маҷбур аз ҷойи хоб хезонд, ғаш карда гуфт, ки ҷӯробҳояш даридагӣ, ба мактаб намераванд. Модараш аз ҷевон риштаву сӯзан гирифта гуфт:

- Ту дасту рӯятро шустан гир. Ман ҷӯробҳоятро медӯзам.

Ӯ ба дастурӯйшӯйӣ надаромада, доду фарёди Маҳинро баровард. Дид, ки хоҳаракаш даст мешӯяд, аз паси гиребонаш як каф оби хунук рехт.

Ба хотири он ки димоғи Шоҳин бисёртар насӯзад, модар гуноҳи ӯро бахшид. Фақад гуфт:

- Бачаи калон ин хел намешавад. Маҳинро бин, худаш аз хоб хест, либосашро пӯшид, дастурӯй шуст, акнун чой мехӯраду ба боғча меравад. Ту дар синфи як мехониву мисли кӯдакҳо ғаш мекунӣ.

Вақте ки модару Шоҳину Маҳин аз дар баромаданд, хоҳаракаш гуфт:

- Очаҷон, мо имрӯз ба сирк меравем. Чил дирам бурдан даркор.

- Духтарам, шаб чаро нагуфтӣ?

Модар саросема ҳамёнро кушоду чил дирам баровард.

- Акнун тез-тез равем, ки ман ҳам ба кор дер намонам,- ба ҷайби Маҳин пулро гузошта гуфт модар.

Ба сари роҳи калон ки расиданд, Шоҳин нағмаро сар кард.

- Ба мактаб намеравам!

Модар бо ҳайронӣ пурсид:

- Чаро?

- Ба ман ҳам чил дирам диҳед, баъд меравам.

- Дирамҳоро чӣ кор мекунӣ, бачам?

- Мехӯрам. Ҳама аз ошхонаи мактаб ҳар чиз харида мехӯрданду мехӯранд. Ман нигоҳ карда шинам?

Модар оҳи сабук кашиду гуфт:

- Агар гушна монӣ, кулчаи даруни халтачаатро гиру хӯр. Бомазза, равғанин, ҳоло пули зиёдатӣ нест, ки ба ту диҳам.

Якравии Шоҳин зиёдтар мешуд.

- Не, намеравам.

Модар намедонист, ки чӣ кор кунад. Имдодталабона ба атроф нигоҳ кард.

Маҳин пули худро аз ҷайбаш бароварду ба Шоҳин дароз кард. Модар саросема пурсид:

- Сиркравӣ чӣ мешавад?

- Ба сирк намеравам, бисёр рафтаам, ба дилам задааст.

Модари ба ҳаяҷономада хам шуду аз сару рӯи Маҳин бӯсидан гирифт.

- Майлаш, рафтем , дер шуд.

Дар рӯ ба рӯ мактаби Шоҳин намоён шуд.

- Хайр бачам, шӯхӣ накун, гапи муаллимонро гӯш кун.

Шоҳин ба сӯи мактаб давиду ногоҳ бозистод ва оҳиста ба Маҳину модараш наздик омад. Даст дароз кард, дар рӯи кафаш чанд дирами маҷақшуда буд. Бо сари хам гуфт:

- Ма, гир, Маҳин. Имрӯз барои ман кулча бас, пул даркор не.

Дар чашмони модар ашк ҳалқа зад.

Гулназар