Дар озмуни ноҳиявии “Фурӯғи субҳи доноӣ...” – и ноҳияи Дарвоз зиёда аз 20 нафар довталабон аз ҷамоатҳои ноҳия ширкат карда, 10 нафари онҳо сазовори зинаҳои ифтихорӣ шуданд.

Дар ин бора Хуршед Ғаффоров, сармутахассиси Бахши кор бо ҷавонон ва варзиши ноҳия иттилоъ дода гуфт, ки иштирокчӣ Нурмаҳмад Буров аз уҳдаи ҳамаи талаботҳои озмун баромада, шоҳҷоизаву (1000 сомонӣ мукофотпулӣ) ифтихорномаи раиси ноҳия ва туҳфаҳои гуногуни мақомоти ҳокимияти давлатии ноҳияро соҳиб шуд.

Бояд қайд кард, ки дар номинатсияи аз ёд кардану хондани осори адабиёти классики тоҷик ҷойи якумро Гулангези Пулодҷон ва Ҳикматулло Ҳикматуллоев, Илҳомзода Махфират зинаҳои дуюму сеюмро ишғол намуданд.

Дар номинатсияи аз ёд кардану хондани осори адибони муосири тоҷик Саломатшоев Шаҳбоз сазовори зинаи аввал ва Шораҳматова Паймонаву Зулфонаи Хушмурод ҷойҳои дуюму сеюмро гирифтанд.

Ба ҳамин тартиб дар номинатсияи аз ёд кардану хондани ашъори бачагона ва афсонаву ривоятҳои халқи тоҷик Абдураҳмонова Малика сазовори ҷойи якуму Шодавлатова Мафтуна ва Одинаева Дилангез бошанд зинаҳои дуюму сеюмро ба даст оварданд.