Подшоҳе сарзаминҳои зиёд дар ихтиёр дошту сарваташ бешумор буд. Ва ҳар ҷое, ки мерафт, қисме аз сармояашро бо худ мебурд, то ба дигарон чи қадар ҳашмат ва боигарӣ доштанашро нишон диҳад. Аз ин кор бисёр ифтихор ҳам мекард.

Подшоҳ аз ҷумлаи дарбориёнаш ба як мушовири донишмандаш эътимоди бештар дошт ва ҳар масъалае пеш меомад, ҳатман аз вай пурсон мешуд.

Боре дар ғояти фахру такаббур ба мушовираш рӯ оварда пурсид:

- Ту донишманде ҳастӣ, ки ҳама пеши илму ирфони ту сари таъзим фурӯ овардаанд. Бисёр илм андӯхтаӣ ва маслиҳатҳои муфид медиҳӣ. Мехоҳам дар хусуси сарвату салтанати ман фикратро баён кунӣ. Бигӯ, ки дороии ман ба чи меарзад?

Мушовир гуфт:

- Бузургворо, тасаввур кунед, ки шумо дар биёбони нопайдоканоре танҳоед. Аз фарти ташнагӣ беҳолу мадор шудаед, вале дар атроф об нест, чашмае ҳам наменамояд. Дар чунин ҳолат нафаре бо як коса об пайдо мешавад. Оё шумо омодаед, то барои он косаи об ними сарвати худро диҳед?

- Албатта, ними сарватамро медодам. Охир, дар он биёбони сӯзон беоб зистан маҳол....

- Шумо боз ба роҳ медароед, вале чанде нагшузашта боз ташнагии шадид азиятатон медиҳад. Барои як коса оби дигар оё омодаед, ки ними дигари сарвати худро бидиҳед? – мепурсад мушовир аз подшоҳ.

- Илоҷи дигар нест. Барои зинда мондан он ними боқимондаи сарватамро ҳам медодам.

- Пас, сарвати шумо ба он ду коса об баробар аст, подшоҳам!

Таҳияи Г. Рабиева, www.oftob.org